Знон РЦИ-Аланийы Сæргълæууæг БИТАРТЫ Вячеслав Хицауады хæдзары 26 бинонтæн кадджын уавæры радта сертификаттæ сæ царды уавæртæ сын фæхуыздæр кæныны тыххæй. Ацы хорз хъуыддаг æххæстгонд æрцыд УФ-йы Паддзахадон программæ «Развитие сельского хозяйства и регулирование рынков сельскохозяйственной продукции, сырья и продовольствия на 2013-2020 годы»-йы дæлпрограммæ «Устойчивое развитие сельских территорий»-ы фæрцы
Программæйы домæнтæм гæсгæ, бинонтæн сæ зæрды цы хæдзар балхæнын ис, уымæн йæ аргъы 70 проценты бафидыны хæс йæхимæ райста паддзахад, иннæ 30 проценты та — бинонтæ сæхæдæг. Ацы хъуыддаджы фæдыл нæ республикæмæ æрвыст æрцыд 17 милуаны æмæ 378 мин сомæй фылдæр, республикон бюджетæй йыл схардз кодтой 1 милуан æмæ 308 мин сомы бæрц, бынæттон бюджеттæй та 5 милуан сомæй фылдæр. Сертификаттæ цы бинонтæн радтой, уыдон программæйы домæнтæм гæсгæ, хъуамæ ацы уавæртæй спайда кæной афæдзы кæронмæ. Сæрмагонд къамисы уынаффæмæ гæсгæ сертификаттæй 19 радтой æрыгон бинонтæ æмæ æрыгон специалисттæн, иннæтæ та — 35 азæй фылдæр кæуыл цæуы, ахæмтæн.
Программæйы архайдтой республикæйы районтæ иууылдæр, Æрыдоны районæй фæстæмæ. Уый та уымæн, æмæ сæ къухы нæ бафтыд, рагацау программæйы архайынæн районæй цы æхцайы бæрц домдтой, уыцы хæдзар æлхæнджыты æххуысæн, уыдон бюджеты бавæрын. Æппæты фылдæр сертификаттæ райстой Рахизфарсы районы цæрджытæ. Бæрæггæнæнтæм гæсгæ, æдæппæт ацы сертификатты руаджы æлхæд æрцæудзæн 1 893 квадратон метры, уыдонæй — 1353 квадратон метры сты æрыгон бинонтæн. Сертификаттæй æппæты къаддæр субсидийы бæрц у 415 000 сомы, æппæты фылдæр та — 1 200 000 сомы. Субсидийы бæрц нысангонд цæуы, бинонтæ цал адæймаджы сты, уымæ гæсгæ. Иу адæймагæн 33 квадратон метры нымайгæйæ.
Битарты Вячеслав арфæ ракодта сертификаттæ чи райста, уыдонæн æмæ загъта: «Тынг æхсызгон мын у, уæ фылдæр æрыгæттæ кæй сты, уый. Уымæй бæрæг у, фæсивæды хъæуты цæрын кæй фæнды, кæй сты иузæрдион, кæм райгуырдысты, уыцы бынæттыл. Дарддæр дæр фылдæр не ‘ргом здахдзыстæм хъæуты æркæсинаг фарстатæм, фæндæгтæ, культурæйы хæдзæрттæ, спортивон комплекстæ аразынмæ. Хъæуты байгом кæндзыстæм 40 ФАП-ы. Ахсджиагдæр та у хъæуты фæсивæдæн куысты бынæттæ аразын. Ацы сертификаттæ нысаныл хардзгонд кæй æрцæудзысты, уый мæ уырны. Цы ног хæдзæрттæм бакъахдзæф кæнат, уырдыгæй та уæ сабиты хъæлдзæг худын куыд хъуыса, ахæм амонд уæ уæд».
Программæйы домæнтæм гæсгæ серификаты æхцатæй хæдзар балхæнæн ис æрмæстдæр хъæуы. Сертификатты хицæуттæ райгондæй баззадысты. Бæззаты — Лазарты Зæлинæ (Ног Бæтæхъойыхъæу) Хуымæллæджы скъолайы ирон æвзаг æмæ литературæйы ахуыргæнæг:
«Тынг бузныг дæн, ацы программæ чи расидт æмæ кæй руаджы æнтысы, уыдонæн, фыццаджыдæр та — Битарты Вячеславæн. Бирæбинонджынтæн, йæ цæрыны уавæртæ фæхуыздæр кæныны хъуаг кæмæн сты æмæ сæхи хъарутæй сæ бон хæдзар саразын кæмæн нæу, уыцы фыдæбонгæнджытæн ахæм æххуыс Хуыцауæй æрвыст лæварау у. Махæн нæ зæрды ис Ног Бæтæхъойыхъæуы хæдзар балхæнын. Нæ кæстæртæ уым райгуырдысты, уарзынц сæ хъæу æмæ мæ фæнды, цæмæй дарддæр дæр сæ царды бонтæ ам арвитой, уый».
РЦИ-Аланийы Хъæууон хæдзарады министрады инвестициты хайады хицауы хæдивæг Сергей Ткачев куыд загъта, афтæмæй иннæ аз сертификатты нымæц дзæвгар фæфылдæр уыдзæн, рагацау зæгъæн ис, 45-æй къаддæр кæй нæ уыдзысты, уый. ХЕТÆГКАТЫ Оксанæ
