Знон Цæгат Ирыстоны Сæргълæууæг БИТАРТЫ Вячеслав Дзæуджыхъæуы администрацийы разамындимæ бабæрæг кодта, ныртæккæ аразджытæ кæм кусынц, цалдæр ахæм горæтаг объекты.
Уыдонæй иу — Дзæуджыхъæуы планетари. Ацы ахсджиаг объект куыд цалцæггонд цæуы, уый тыххæй республикæйы Сæргълæууæгæн радзырдта С.А. Лавочкины номыл науконкуыстадон иугонды сæйраг специалист, космосон аппаратты конструктор Къомайты Руслан. Планетарийы реконструкцийыл бæрнон у подрядон компани «Хорс». Историон агъуыстæй уæлдай, компани Терчы былгæрон аразы космонавтикæйы скъола дæр.
Фембæлды рæстæг куыд загъдæуыд, афтæмæй объекты техникон ифтонгдзинадæн бахъæудзæн 9 милуан сомы бæрц. Куыстыты хæрзхъæддзинадмæ æркæсгæйæ, Битарты Вячеслав зæрдæ бавæрдта, техникон ифтонгдзинадæн хъæугæ фæрæзтæ бацагурыны хъуыддаджы æххуыс кæй уыдзæн, уымæй.
Уый фæстæ Битарты Вячеслав федта, Къостайы проспекты трамвайты фæндæгтæ куыд ивд цæуынц, уый. Горæты администрацийы минæвæртты ныхасмæ гæсгæ, куыстыты хæрзхъæддзинадмæ ис бæстон цæстдард.
Нæ уацхæссæг
