Ирыстоны фæллойадон намысыл йæ зонд æмæ зæрдæйы хорзæхæй фарн чи æфтыдта, уыцы арфæйаг адæймæгтæй иу уыд Заманхъулы кадджын хистæртæй иу, газет «Рæстдзинад»-ы иузæрдион хæлар æмæ æхсæнадон уацхæссæг Дзиойты Мухтар. Уый йæ рæстзæрдæ фæллойæ хорз фæд ныууагъта йæ хъæубæсты æхсæн.
Мухтарæн ацы аз йæ райгуырдыл сæххæст 85 азы. Уый фæдыл æрæджы йæ райгуырæн хъæу Заманхъулы уыд Мухтары номарæн изæр. Æрбамбырд æм сты районы æхсæнады минæвæрттæ, хъæубæсты цæрджытæ, Дзиойты Мухтары хæстæджытæ æмæ зонгæтæ. Дзиойы-фырты райгуырдыл 85 азы сæххæсты бонмæ зындгонд зарæггæнæг, РЦИ-Аланийы культурæйы сгуыхт кусæг Сечъынаты Альбинæ систа документалон киноныв «Память сердца». Уым сæ зындгонд хортауæг Мухтары цардвæндаг æмæ фæллойадон сгуыхтдзинæдты тыххæй сæ хъуыдытæ загътой йе ‘мхъæуккæгтæ æмæ æрвадæлтæ.
Зæгъын хъæуы уый, æмæ кинонывы автор Сечъынаты Альбинæ йе сфæлдыстадон æрмдзæфы фæрцы канд Мухтары цардвæндаг ирдæй нæ равдыста, фæлæ ма бæлвырдæй æрдзырдта советон дуджы, алы азты Заманхъулы хъæуы цы фæллойгæнджытæ уыд, уыдоны хъазуатон куысты æнтыстдзинæдтыл ирдæй равдисыныл бацархайдта.
Номарæн æмбырдмæ æрбацæуджытæ кинонывмæ куы бакастысты, уæд уый фæстæ раныхас кодта УФ-йы æмæ РЦИ-Аланийы культурæйы сгуыхт кусæг, зындгонд фыссæг Дауыраты Дамир. Уый фехъусын кодта газет «Рæстдзинад»-ы æмæ газет «Рахизфарсы цард»-ы æхсæнадон уацхæсджытæн Дзиойты Мухтары номыл цы конкурс арæзт æрцæуы, уымæн йæ ацы азы бæрæггæнæнтæ.
2018 азы хъæууон цардыл æмæ фæллойгæнджытыл хуыздæр æрмæг ныффыссыны тыххæй газет «Рæстдзинад»-ы Дзиойты Мухтары номыл премийы лауреаттæ систы: зындгонд журналист, фыссæг Хестанты — Бутаты Победæ (1-аг преми), Дзæуджыхъæуы 5-æм профессионалон-техникон училищейы ирон æвзаг æмæ литературæйы ахуыргæнæг Хъайтыхъты Риммæ (2-аг преми) æртыккаг преми газет «Рæстдзинад»-ы æхсæнадон уацхæсджытæй лæвæрд никæмæн æрцыд.
Дзиойты Мухтары райгуырдыл 85 азы сæххæсты бонмæ æртыккаг хатт бакуыстгондæй æмæ æххæстдæрæй рухс федта фыссæг Дауыраты Дамиры уацау «Дзиойты Мухтары бæрзонд кувæндон». Юбилеймæ ма хицæн чиныгæй уагъд æрцыдысты Мухтарæн йæ цыргъзонд хъуыдытæ æмæ хъæлдзæг ныхæстæ.
АНВАРАТЫ В.
