Дзыллон фестиваль «Северный Кавказ: синтез мира, синтез искусств»-ы жюрийы сæргъы уыдзæн Санкт-Петербурджы Марияйы театры аивадон разамонæг ГЕРГИТЫ Валери. Уый тыххæй фехъусын кодта Цæгат Ирыстоны Мыхуыр æмæ дзыллон коммуникациты комитеты пресс-службæ.
Фестивалы тыххæй уагæвæрды куыд загъд ис, афтæмæй мадзалы йæ хъарутæ равдисыны фадат ис Цæгат Кавказы федералон зылды регионты цæрджытæй се ‘ппæтæн дæр. Уыимæ, кæй зæгъын æй хъæуы, конкурсы уæлахиздзаутæ æмæ лауреатты бæрæг кæнгæйæ, сæрмагонд æргом здæхт цæудзæн фестивалы архайджыты аивад æмæ сфæлдыстады национ хæдбындурдзинадмæ.
Фестивалы лауреаттæ æвзæрст æрцæудзысты 5 номинацийы: поэзи, къамтæ исын, хореографи, зарæг æмæ музыкалон инструменттыл цæгъдын. Фестивалы кæронбæттæны архайджытæ сбæрæг уыдзысты сентябры. Уыдонæн Мæскуыйы иумæйаг концерт уыдзæн нæ бæстæйы зындгонддæр сфæлдыстадон коллективтимæ иумæ.
Нæ уацхæссæг
