Урайлаг хæххон-металлургон компани фадæттæ скодта скъоладзауты ‘хсæн наукон-техникон сфæлдыстадон конкурсæн. Свердловскы облæсты центр «Таватуй» суазæг кодта уæрæсейаг регионтæй 95 скъоладзауы, 14 азæй 17 азы кæуыл цыд, ахæм курдиатджын сывæллæтты. 2017 азы сентябрæй 2018 азы мартъимæ чи цыд, уыцы конкурс «Инженериада УГМК»-йы кæронбæттæны уæлахиздзаутæ ныр ерыс кодтой, æвдыстой сæ арæхстдзинæдтæ. Беслæны скъолайы ахуырдзаутæ СУГЪАРАТЫ Зауыр æмæ ДЗУКЪАТЫ Андер кæуыл бакуыстой, уыцы проекттæн саккаг кодтой дыккаг æмæ æртыккаг премитæ.
Лозунг «Доверься мне, я инженер»-имæ Уралы рæсугъд цад Таватуйы былгæрæтты æртæ къуырийы дæргъы цыд сæрдыгон инженерон рад «ТехноЛидер». 21 боны дæргъы сывæллæтты лагерæй рауад егъау лабораторон комплекс. Сæрмагондæй инженерон радæн амынд компанийы Техникон университет кæуыл бакуыста, уыцы ахуырадон программæйы уыд психологион фæлварæнтæ, мастер-класстæ, экскурситæ æмæ зонындзинæдты хъæзтытæ. Фæлтæрдджын методисттæ сывæллæтты ахуыр кодтой иртасæн куыст кæныныл, проекттæ аразын æмæ командæйы кусыныл.
Инженерон рады архайджытæ сæйраг æргом аздæхтой хайæдтæ «урбанистикæ»-мæ, «энергетикæ», «биоинженерия», «логистика», «финтех» æмæ «робототехника»-мæ. Æвзонг инженертæ хæххон-металлургон компанийы эксперттимæ иумæ горæт Уæллаг Пышмæйæн велофæндæгты проектыл кæм бакуыстой, зилгæйаг Дзукъаты Андер равзæрста урбанистикæйы ахæм лаборатори. Горæтæгтæ се ‘ргом кæмæ аздахдзысты, раздæр ахæм культурон цаутыл ахъуыды кæнгæйæ, фæсивæд сæрмагондæй концерттæн сарæзтой сæрдыгон сценæйы проект, фæстæдæр та сæрмагонд программæйы æххуысæй фæбæрæг кодтой горæты æппæтæй мидисджындæр бынæттæ æмæ велофæндæгты æххуысæй горæтгæрæттæ центримæ баиу кодтой. Проектмæ гæсгæ, арæзт æрцæудзысты велошерингы лæггад кæнынады 8 бынаты, велокафе æмæ артобъекттæ.
— Горæты инфраструктурæ фæнывыл кæныны æмæ адæмы цард нырæй удæнцойдæр скæныны фадат кæй фæрцы уыдзæн, уыцы проект цæттæ кæныны куысты архайдтон, — загъта Андер.
Сугъараты Зауыр дæр куыста мидисджын проектыл. Дæнцæгæн акционерон æхсæнад «Уралэлектромедь» æрхæсгæйæ, скъоладзаутæ специалистты разамындæй куыстой промышленнон куыстуаты хардзгонд электрон тыхы бæрц бæлвырдæй нымайæн проектыл. Проекты фæрцы уыд рагагъоммæйы бæрæггæнæнтæ фæнывыл кæныны фадат.
— Ивгъуыд азы «Уралэлектромедь» -ы бæрæггæнæнтæ бахынцгæйæ, куыд рабæрæг кодтам, афтæмæй нæ проекты фæрцы куыстуатæн уыдаид афæдзмæ æрмæст иунæг цехы 400 мин сомы сфæстауæрц кæныны фадат, — зæгъы Зауыр.
3 августы амынд компанийы сарæзтой кæронбæттæн равдыст, инженерон рады архайджытæ та сæ проекттæ хъахъхъæдтой. Зауыр кæй бакуыстыл архайдта, энергетикæйы уыцы проект бацахста дыккаг, Андеры архайдимæ урбанистикæйы проект та — æртыккаг бынат. Хуыздæр проекттæн уыдзæн металлургон иугонды куыстуæтты баххæст кæныны фадат.
Цæгатирыстойнаг лæппутæм инженерон рад «ТехноЛидер»-ы фæрцы фæзындысты ITтехнологиты къабазы ног зонындзинæдтæ, базонгæ сты æппæт бæстæйæ курдиатджын æмгæрттимæ.
Акционерон æхсæнад «Электроцинчы» пресс-службæ
