Горæтгæрон районы Ирыхъæуы цæрæг МÆХЪИТЫ Шаликъо раздæр ацы хъæуы астæуккаг скъолайы хæдзарадон куыст кодта. Иу рæстæджы мын скъолайы кæрты къухæй амоны иу рæсугъд лæппумæ æмæ афтæ зæгъы: «Уæртæ уыцы лæппу Гаджитæй у, 8-æм къласы ахуыр кæны. Ныр æм цасдæр рæстæг мæ хъус дарын, æмæ мæ зæрдæмæ тынг цæуы йæ уагахаст. Аив — йæ ацыд, йе ‘рбацыд, уæлдай митæ нæ кæны, хъæлæба дзы нæ фехъусдзынæ, йæ хъазт дæр — нывыл. Ахуыргæнджыты фарстон, æмæ мын дзы раппæлыдысты, ахуыры, дам, ын æнтыстдзинæдтæ ис. Алыхуызон мадзæлтты, олимпиадæты архайы. Тæхуды, ахæм кæстæртæ нæм бирæ куы уаид».
Фæстæдæр мæхæдæг дæр базыдтон ацы лæппуйы — Ирыхъæуы Терешковайы уынджы цæрæг Гаджиты Зауыры фырт Дмитри. Арæх æй уыдтон куывдты, чындзæхсæвты лæггадгæнгæ, æмæ мын æхсызгон уыд. Æгъдауыл — йæ фезмæлд, æнæзивæг.
Димæ æнтыстджынæй каст фæци астæуккаг скъола æмæ фæлварæнтæ радта Цæгат Кавказы хæххонметаллургон институты юридикон факультетмæ, æмæ уым дæр йæ ахуыр хорзæй ахицæн кодта. Институты æхсæнадон хъуыддæгты дæр уыд фæзминаг.
Йæ дарддæры фæндаг та уыд Уæрæсейы æфсады рæнхъытæм. Ныртæккæ службæ кæны Мæскуыйы 5126 æфсæддон хайы. Цы сгуыхтдзинæдтæ йын ис Фыдыбæстæйы раз, уымæн ирд æвдисæн у, йе ‘фсæддон хайы хъахъхъæнджыты цæугæ къорды ротæйы командиры хæстæ рæстæгмæ æххæстгæнæг лейтенант М. Аликберов Горæтгæрон районы æфсæддон комиссар Константин Качаровмæ цы фыстæг æрæрвыста Дмитрийы тыххæй, уый. Кæсæм дзы: «Зынаргъ Константин Качаров, бузныг дын зæгъын, не ‘фсæддон хаймæ нын службæ кæнынмæ æвзонг салдат Гаджиты Зауыры фырт Дмитрийы кæй æрæрвыстай, уый тыххæй. Йæ æфсæддон-профессионалон зонындзинæдтæ фылдæр кæныныл кусы, хæцæнгарзы материалон хай зоны. Хæцæнгæрзтимæ архайгæйæ æдасдзинады домæнтæ æххæст кæны.
Иумæйагæфсæддон уставы бындурон уагæвæрдтæ æххæстæй зоны. Сæрмагонд хæстæ æххæст кæны цæсгомджынæй. Йæ хъус дары, йæ бæрны чи ис, уыцы техникæмæ. Архайы æхсæнадон фæтк хъахъхъæныныл. Мæскуы æмæ Мæскуыйы облæсты æхсæнадон æдасдзинад ифтонг кæны. Физикон æгъдауæй у хорз цæттæ. Æфсæддон æмæ паддзахадон сусæгдзинæдтæ хъахъхъæнын зоны. Уымæ гæсгæ рæнхъон Гаджиты Дмитри йæ моралон-психикон æмæ хъуыддагон хæрзхъæддзинадмæ гæсгæ у паддзахадон уагдæтты уæлдæр профессионалон ахуырмæ бацæуыны аккаг».
Ацы хорз хабарыл фæцин кодтой Димæйы мад Лейлæ æмæ фыд Зауыр, иннæ хиуæттæ, æмбæлттæ, сыхбæстæ.
Фæрнæй службæ кæн, Димæ!
ГАССИТЫ Моисей
