Тагъд рæстæг Цæгат Ирыстонмæ ногæй ссæудзысты дохтыртæ Санкт-Петербургæй. Медицинон десант нæ республикæйы уыдзæн 9-16 сентябры.
Уыцы бонты алыхуызон специалисттæ, се ‘хсæн терапевттæ, нейрохирургтæ, неврологтæ, урологтæ, трансплантологтæ, травматологтæ, пульмонологтæ, дадзинты хирургтæ, отоларингологтæ, цæстыты низты дохтыртæ æмæ æндæртæ — æркæсдзысты рынчынтæм æмæ дзы равзардзысты, Санкт-Петербурджы Павловы номыл Фыццаг медицинон университеты клиникæты дзæбæх кæнын кæй хъæуы, ахæмты.
Дохтыртæн сæ куыстæн фидаргонд æрцыд сæрмагонд уаг, уымæ гæсгæ: 10 сентябры уыдон уыдзысты Горæтгæрон районы Центрон рынчындоны; 11 сентябры — Дзæуджыхъæуы 1- æм поликлиникæйы; 12 сентябры — Рахизфарсы районы Центрон рынчындоны; 13 сентябры — Алагиры районы Центрон рынчындоны æмæ 14 сентябры — Æрæфы районы Центрон рынчындоны.
«Санкт-Петербурджы дохтыртæ — Дзæуджыхъæуы», зæгъгæ, ацы сæрмагонд проектæн йæ райдайæн уыд æртæ азы размæ. Ацы хорз хъæппæрис равдыстой Цæгат Ирыстоны минæварад Цæгат-Ныгуылæйнаг федералон зылды, стæй СанктПетербурджы ирон диаспорæ.
Æртæ азы дæргъы петербургаг дохтыртæ æркастысты цæгатирыстойнаг 3 500 адæймаджы æнæниздзинадмæ, уыдонæй 1300 адæймаджы дзæбæх кæнынмæ арвыстой Санкт-Петербургмæ, 830 рынчынæн та скодтой операцитæ Павловы номыл Фыццаг медицинон университеты клиникæты. Проектæн йæ сæйраг нысан у нырыккон медицинæйы гæнæнтæ алы рынчынмæ дæр бахæццæ кæнын. Проекты фæлгæты æппæт дзæбæхгæнæн мадзæлттæ, консультацитæ, операцитæ конд цæуынц лæвар.
Санкт-Петербурджы кардиологты къухтæм чи бахауд æмæ уыдон æнтыстджын операци кæмæн скодтой, уыдонæй иу у Тауаситы Мæирбег. Куыд зæгъы, афтæмæй петербургаг дохтыртæн сæ дæсныдзинад æмæ профессионалон зонындзинæдтæ сты фæзминаг. «Ацы проект Ирыстонæн у стыр ахсджиаг. Бæлвырд æй зонын, йæ рæстæджы мæн чи хъуыд, ахæм медицинон æххуыс рæхджы кæй уыдзæн Ирыстоны цæрджытæй иннæтæн дæр. Клиникæйы цалынмæ мæхи дзæбæх кодтон, уæдмæ базонгæ дæн ме ‘мзæххонтæй бирæтимæ, университеты клиникæйы алы хайæдты йæхи чи дзæбæх кодта, ахæмтимæ. Зæгъæм, æрмæст кардиологийы хайады мæнæй уæлдай уыцы рæстæг ахæм операцитæ скодтой ирыстойнаг 8 рынчынæн. Ногæй æмæ ногæй арфæ кæнын Санкт-Петербурджы ирон диаспорæйæн, Уæрæсейы хуыздæр æмæ раззагдæр медицинон кусæндæттæй иуы Цæгат Ирыстоны рынчынтæн сæхи дзæбæх кæныны фадат кæй ис, уый тыххæй», — зæгъы Мæирбег. Санкт-Петербурджы Павловы номыл Фыццаг медицинон университеты ректор Сергей Багненко раздæр дæр медицинон æгъдауæй æххуыс кодта РЦИ-Аланийы цæрджытæн, æмæ уый тыххæй хорзæхджын æрцыд майдан «Ирыстоны Намысæн»-æй. Ацы хатт дæр та Сергей Федоры фырт стыр разæнгардæй рахæцыд, университеты клиникæты 21 алыхуызон специалисты Цæгат Ирыстонмæ ногæй цæмæй ссæуой, уыцы хъæппæрисы фарс.
Куыд загътам, афтæмæй проект аразджытæ сты Республикæ Цæгат Ирыстон- Аланийы минæварад Цæгат- Ныгуылæйнаг федералон зылды, Санкт-Петербурджы æмæ Ленинграды облæсты ирон диаспорæ æмæ Республикæ Цæгат Ирыстон- Аланийы разамынд.
«Махæн у тынг æхсызгон, нæ райгуырæн Ирыстоны цæрджытæн æххуыс кæнын нæ бон кæй у æмæ нын уымæн гæнæнтæ кæй ис, уый. Ацы проект ныр æртæ азы дæргъы æххæстгонд кæй цæуы, уый тыххæй мæ фæнды арфæ ракæнын Санкт- Петербурджы Павловы но- мыл Фыццаг медицинон университеты разамонджы- тæ æмæ дохтыртæн, Рес- публикæ Цæгат Ирыстон- Аланийы разамындæн, стæй не ‘мзæххон, хъуыстгонд меценат æмæ амалхъом адæймаг Боллоты Тайму- разæн. Се ‘ппæтæн дæр мæ зæрдæ зæгъы æнæниз- дзинад æмæ фæрныг цард», — бафиппайдта Санкт-Петербурджы æмæ Ленинграды облæсты ирон диаспорæйы сæрдар Нани- ты Петр.
Нæ уацхæссæг
