РЦИ-Аланийы Хицауады Сæрдар ТУСКЪАТЫ Таймураз æмæ культурæйы министр МИЛДЗЫХТЫ Руслан æрæджы бабæрæг кодтой РЦИ-Аланийы Национ музей. Уым федтой, экспозицион залы æмæ фондты æвæрæнты арæзтадон куыстытæ кæронмæ куыд фæхæццæ кæнынц, уый. Равдыстыты залы фæзуат у 2000 квадратон метры, фондты æвæрæнты фæзуат та — 678 квадратон метры
Национ музейы генералон директор Къубалты Валери Хицауады Сæрдар Тускъаты Таймуразæн æмæ культурæйы министр Милдзыхты Русланæн радзырдта, сæ музейы ма кæй байгом уыдзæн нæ республикæйы туристон информацион центр. Йæ кусджытæн дзы арæзт æрцæудзæн æппæт фадæттæ дæр центры æнтыстджын рухстауæн архайдæн. Ныридæгæн дзы кæронмæ фæхæццæ кæнынц арæзтадон куыстытæ, йæ кусæн уæттæм æлхæд æрцыд компьютертæ, стъолтæ, скъаппытæ.
— Национ музейы æвæрæнты ис хъæздыг историон æрмæджытæ. Уыдон æвдисынц нæ адæмы культурæ æмæ ивгъуыд цард. Сæ фæрцы та нæ бон уыдзæн нæ республикæмæ фылдæр туристты æргом раздахын, — загъта Тускъайы-фырт.
Уазджытæ разыйæ баззадысты, музейы арæзтадон куыстытæ куыд цæуынц, уымæй. Тускъаты Таймураз ма федта музейы кæрт дæр æмæ загъта: хорз уаид кæртæн æмæ музейæн йæ историон фæлгонц раздахыныл бакусын, йæ алыварс фæзуаты аивдзинадыл бацархайын.
РЦИ-Аланийы Сæргълæууæджы æмæ РЦИ-Аланийы Хицауады прессслужбæ
