РЦИ-Аланийы терроризмы идеологийы ныхмæ 2017-2018 азтæн комплексон пъланы нысантæ царды нывыл уагъд кæй цæуынц, уый тыххæй ныхас цыд, Терроризмы ныхмæ нæ республикæйы цы къамис арæзт æрцыд, уый æмæ оперативон штабы иумæйаг æмбырды. Разамынд ын лæвæрдта терроризмы ныхмæ республикон къамисы сæрдары хæдивæг Сергей ТРУШКИН.
Æмбырды РЦИ-Аланийы нациты æхсæн ахастдзинæдты министр Цуциты Аслан куыд фæнысан кодта, афтæмæй ацы азы райдайæнæй министрады специалисттæ республикæйы скъолаты, уæлдæр ахуыргæнæндæтты, сывæллæтты сæрдыгон фæлладуадзæн лагерьты сарæзтой лекцитæ, фембæлдтытæ, æндæр рухсадон мадзæлттæ. Уыдоны рæстæг фæсивæдæн дзырдтой, терроризм æмæ экстремизмæн цы æбуалгъ фæстиуджытæ ис, æхсæнады сæхи куыд хъахъхъæнын хъæуы, сæ фæзындтыты ныхмæ цавæр мадзæлттæ аразын хъæуы, уый.
Министрады специалисттæн фæсивæдимæ цы фембæлдтытæ уыд, уыдоны архайдтой æмæ семæ Дзæуджыхъæуы æмæ республикæйы районты цæлхæмбырдтæ сарæзтой РЦИ-Аланийы пысылмæтты управлени æмæ Æппæтдунеон æхсæнадон змæлд «Иры Стыр Ныхас»-ы разамынд æмæ уæнгтæ, барадон центр «Право на защиту»-йы, республикон æхсæнадон организаци «Лидер-центр»-ы кусджытæ.
Министрады ис сæрмагонд специалистты къорд, кæцытæ кусынц Интернеты хызты æмæ архайынц, цæмæй дзы экстремизм æмæ терроризммæ сидæг информацитæн, æрмæджытæн бынат ма уа. Сæ куыст цас æнтыстджын у, æмæ нæ адæмы зондахастыл куыд ахады, уый та базонынц, æрвылмæй цы мониторинг саразынц, уый фæрцы. Арæзт ма цæуынц æндæр мадзæлттæ адæмы æхсæн хæлардзинады æмæ фидыды тæгтæ фидар кæныны хъуыддаджы.
Терроризмы ныхмæ къамисы æмæ оперативон штабы иумæйаг æмбырды ма ныхас цыд, РЦИ-Аланийы пысылмæтты дины управленийы разамынд æмæ уæнгтæ, терроризмы ныхмæ республикон къамисы уæнгтæ сын сæ размæ цы хæстæ сæвæрдтой, уыдон куыд æххæст кæнынц æмæ, УФ-йы территорийыл терроризмы фæзындтытæ ма ‘руадзыны тыххæй 2013-2018 азтæн федералон комплексон программæйы домæнтæ нæ республикæйы куыд æххæстгонд цæуынц, ууыл управлени иумæйагæй куыд архайы ууыл. Æмбырды ныхас цыд, цардархайды объекттæ, хицаудзинады æппæт оргæнтæ, фæндæгты инфраструктурæ терроризмæй куыд хъахъхъæд цæуынц, уый тыххæй.
РЦИ-Аланийы Сæргълæууæджы æмæ РЦИ-Аланийы Хицауады пресс-службæ
