— Цхинвалы райдыдтой цыппарстъалыджын фысымуат «Ирыстон»-æн йæ дыккаг уæладзыджы арæзтадон куыстытæ. Ныридæгæн бæстыхайы æвæрд цæуынц дыккаг уæладзыгимæ сæ бæттæг цæджындзтæ, — афтæ фехъусын кодта информацион агентад «Рес»-æн арæзтадон куыстытæ æххæстгæнæг организаци «Интурист-Алани»-йы минæвар ЦАКЪОТЫ Витали, — уазæгуаты пъадвалы ныртæккæ цæуынц электон тых уадзæн æмæ аивгæнæн куыстытæ.
«Куыстытæ цæуынц рагагъоммæ бæрæггонд фæткмæ гæсгæ, æхцайы хъуыддаджы дæр ницы къуылымпыдзинæдтæ ис. Аразджытæ кусынц райсомæй изæрмæ. Арæзтадон объекты кусынц 30 специалисты æмæ арæзтадон техникæ. Пъланмæ гæсгæ фысымуат уыдзæн æртæуæладзыгон, йæ фæзуат та 6 мин квадратон метры”, — радзырдта арæзтадон компани «Интурист-Алани»-йы минæвар. Куыд ма загъта, афтæмæй фысымуаты æппæт арæзтадон куыстытæ фæуынвæнд кæнынц 2019 азмæ. Бæстыхайы æддаг бакасты раздæры хуызмæ æвнæлд не ‘рцæудзæн. Уыдзæн дзы 43 уаты (стандартон æмæ хæрзвадатджын люкс-уæттæ), ресторан, бизнес-центр, æнхъæлмæгæсæн уат æмæ банчы хайад.
Бæстыхайы уæттæм æппæт хъæугæ æрмæджытæ балхæндзысты инвесторты æхцайæ. Йæ саразыныл æмæ йæ хъæугæ æрмæджытæй сифтонг кæныныл хардзгонд æрцæудзæн 483 милуаны 651 мин сомы, уыдонæй 430 милуаны радих кæндзысты инвестицион программæмæ гæсгæ. Фысымуат «Ирыстон» ногæй арæзт куы æрцæуа, уæд уый хорзæрдæм фæзындзæн Хуссар Ирыстонмæ туристты æргом раздахыныл.
