Республикæйы промышленнон куыстуæтты уавæрмæ æмхуызонæй нæ хъус дарæм. Фæнды нæ, цæмæй фæстæмæ сæ тыхы бацæуой, уый фæзынид куысты бынæтты нымæцыл, иумæйагæй — социалон фарстатыл.
Экономикон зындзинæдтæ бирæ заводтæ фæцудын кодтой, фæлæ ис, ног базарадон домæнтæ афойнадыл чи бамбæрста æмæ сæм хъæддых чи фæлæууыд, ахæм куыстуæттæ дæр.
Хъæдæрмæгæй конд аив хæдзары дзаумауадзæг куыстуат «Рокос» йæхи базонын кодта йæ хæрзхъæд, зæрдæмæдзæугæ продукцийæ. Фæлæ иу ран нæ лæууы йæ коллектив, нырыккон базарады бынат бацахс æмæ уымæй дарддæр ма акæс — уый сæхицæн нæ барынц. Ныртæккæ куыстад бындуронæй рацаразыныл архайынц. Сæ зæрды ис ног продукцийы хуыз уадзын, ома, тæрсæй конд стъолтæ æмæ бандæттæ. Афтæ зæгъæн ис, æмæ октябры ног лини скусдзæн.
Уый охыл уал цехтæ, линитæ ифтонггонд цæуынц хъæугæ авналæнтæй, уæдæ ног продукци кæм цæттæ кæндзысты, уыцы бынæттæн дæр сæ фæзуат уыдзæн 10 мин квадратон метры. Хæдзарæн хъæугæ хъæдын дзаумауадзæн ифтонггæрзтæ æрбаластой Италийæ. Промышленносты æмæ транспорты министр Хайдарбек Бутов куыд зæгъы, афтæмæй «Рокос» у рæзты фæндагыл лæуд куыстуат. Уыимæ, сæ куыстадон хъуыддаг афтæ сбастой, æмæ сæхæдæг зайын кæнынц хъæугæ хъæдæрмæгæн бæлæстæ, цæттæ кæнынц хомаг, уый фæстæ та дзы хъæдын дзаума аразынц. Ныртæккæ фабрикæйы разамынд архайы ног куыстад байгом кæныныл, фæзындзæн куысты бынæттæ, уæдæ бюджетыл дæр сæмбæлдзысты сæ хъалонтæ.
«Рокос»-ы генералон директор Гобеты Фатимæйы ныхæстæм гæсгæ уал сфидар кодтой хъæдæрмæг хырхæн, фæйнæджытæ «кæрдæн» ифтонггæрзтæ, хъæдæрмæг цæттæ кæнæн нырыккон станоктæ, уымæй уæлдай, хъæдын дзаума æмбырдгæнæнтæ æмæ ахорæнтæ. Зæгъын хъæуы уый, æмæ фабрик пайда кæны энергифæстауæрцгæнæн фæрæзтæй. Куыстадон æппарæццæгтæм дæр хæдзардзинæй кæсынц, ома, хырхæйфадæнтæ, сугтæ бахъæуынц агдоны. Уырдыгæй цы хъарм, цы тæф цæуы, уый фæрцы хус кæнынц фадинаг хъæдæрмæг, уæдæ цехтæ æмæ æндæр бæстыхæйттæ дæр хъарм кæнын хъæуы.
Нæ уацхæссæг
