«Кæдæмфæнды дæр куы абалц кæнæм, уæддæр нæ рох нæ вæййы, нæ Ирыстон æмæ Уæрæсейы минæвæрттæ кæй стæм, уый. Нæ бæрнондзинад æмбаргæйæ, не сфæлдыстад хæссæм дзыллæтæм», — ахæм у, адæмон кафты ансамбль «Дети гор»-ы аивадон разамонæг Къозаты Станиславы хъуыды. Ацы бонты ансамбль сыздæхт дард балцæй, уыдон архайдтой, Италийы цы сфæлдыстадон проект конд æрцыдис, уым. Бацархадтой йыл Уæрæсейы Культурæйы министрад æмæ нæ республикæйы Æхсæнадон музыкалон фонд.
Ансамблы разамонæг куыд зæгъы, афтæмæй æвзонг кафджытæн сæ балц рауадис зæрдæмæдзæугæ, цыдысты автобусыл, федтой Белорусси, Польшæ, Чехи, Австрийы бæстæтæ. Италийы цæгат хайы, горæт Берчетойы цы фæсивæдон-культурон лагерь ис, уым æрмæст цæгатирыстойнаг æвзонг кафджытæ нæ цардысты, фæлæ ма фæсарæйнаг коллективты минæвæрттæ дæр.
Сæ фыццаг концерт Берчетойы цæрджытæ æмæ уазджытæн нæ сывæллæттæ радтой, горæты бæстастæу цы стыр фæз ис, уым. Цы адæм дзы æрæмбырд ис, уыдонæн нæ æвзонг артистты кæфтытæ сæ зæрдæмæ тынг фæцыдысты, æппынæдзух сын æмдзæгъд кодтой. Изæрæй «Дети гор» лагеры æцæг хъазт сарæзтой, сæ кафтмæ иу ран не ‘рлæууыдысты Турчы, Парагвайы, Саратовы хореографион коллективты архайджытæ дæр.
Концертты æхсæн фадат уыдис æмæ афтæмæй сывæллæттæ бабæрæг кодтой Венеци. Æвæццæгæн, уыцы балц сæ зæрдыл бадардзысты. Сæ дыккаг концерт ирыстойнаг æвзонг артисттæн уыдис горæт Пьяченцайы. Уым дæр, горæты егъаудæр фæзы цы дзыллæтæ æрæмбырд, уыдон цингæнгæйæ кастысты нæ артисттæм. Концерт райдыдтой «Симд»-æй, ирон кæфтытæй уæлдай ма бацæттæ кодтой æмæ равдыстой Кавказы цæрæг æмæ дунейы адæмты кæфтытæ дæр. Уыцы концертæй бынæттон газеттæ бацæттæ кодтой æрмæг. Бæрæг уыдис, не сфæлдыстадон коллективы архайд сæ зæрдыл кæй сæмбæлд, уый.
Уый фæстæ та горæт Пармайы уынгты «Дети гор» рацыдысты национ уæлæдарæсы Ирыстон æмæ Уæрæсейы тырысатимæ. Хъуыстысты ирон фæндыры зæлтæ, уыдонмæ та сывæллæттæ иу ран хъуамæ куыд æрлæууыдаиккой. Пармайы мэр Федерико Пиццаротти бузныг загъта ансамблы архайджытæн, кæй сæ бабæрæг кодтой, ирон адæмы хореографион культурæимæ сæ кæй базонгæ кодтой, уый тыххæй. Уыцы бонты ма Пармайы цыдис адæмон кафты дунеон фестиваль дæр æмæ йæ саразджытæ æрхатыдысты нæ чысыл артисттæм, цæмæй концерты акафой.
Цалынмæ ирыстойнаг коллектив Италийы уыдис, уæдмæ лагеры конд цыдис алыхуызон мастер-класстæ кафынæй, ирон фæндырыл цæгъдынæй, уæдæ сывæллæтты мадæлтæй балцы чи уыдис, уыдон скодтой ирон чъиритæ, æндæр национ хæринæгтæ æмæ иннæ хореографион коллективты уæнгтæ семæ базонгæ сты, сахуыстой сæ. Диссаг сæм фæкастысты, фирмæ «Асик»-ы кусджытæ цы куклатæ цæттæ кæнынц, уæдæ, фирмæ «Фæндыр» цы национ музыкалон инструменттæ аразы, уыдон дæр. Афтæ зæгъæн ис, æмæ ацы балцы рæстæг цæгатирыстойнаг коллектив дунейы бæстæты минæвæртты базонгæ кодта нæ национ культурæимæ.
АБАЙТЫ Зæлинæ
