Уæрæсейы Федерацийы Президенты Указмæ гæсгæ 1 октябрæй фæстæмæ æппæт бæстæйы, уыимæ нæ республикæйы дæр, райдыдта сидтон лæппутæм Уæрæсейы æфсады тагъд æмгъуыдмæйы службæмæ æрсидыны куыст. Ныридæгæн уал Цæгат Ирыстонæй алыхуызон æфсæддон хæйттæм æрвыст æрцыд сæдæ лæппуйы.
Дзæуджыхъæуы Намысы мемориалы уыдис ирыстойнаг сидтонты иу къорды Уæрæсейы Гæрзифтонг тыхтæм кадджын уавæры афæндараст кæныны мадзал. Байгом æй кодта республикæйы æфсæддон комиссары хæдивæг Габеты Алан. Уæрæсейы æмæ Ирыстоны тырысатæ æрбахæссыны фæстæ уæлдæфы азæлыдысты Уæрæсейы Федерацийы æмæ РЦИ-Аланийы гимнтæ. Уый фæстæ Фыдыбæстæ хъахъхъæнджыты ног фæлтæры номæй сидтон лæппутæй дыууæ, Фыдыбæстæйы Стыр хæсты Ирыстонæй чи фæмард, уыдоны ном ссардтой венокæй, сæвæрдтой йæ æнусон арты фарсмæ бæрзонд стелæйы рæбын.
Ныхасы бар лæвæрд æрцыд республикæйы сидтон къамисы сæрдар, РЦИ-Аланийы Хицауады Сæрдары хæдивæг Томайты Ирбегæн.
— Зынаргъ сидтонтæ! — загъта Томайы-фырт. — Бар мын раттут РЦИ-Аланийы Сæргълæууæг Битарты Вячеславы æмæ республикæйы Хицауады номæй сымахæн арфæ ракæнынæн æфсæддон службæмæ уæм æрсидыны фæдыл. Уæрæсейы Федерацийы Гæрзифтонг тыхты службæ кæнын Уæрæсейы алы гражданинæн дæр у йæ кадджын хæс. Мæ зæрдæ уын зæгъы, цæмæй фæдараст фæуат уæ службæйы бынæттæм. Хъусут уæ командиртæм æмæ æфсæддон хицæуттæм, æмæ уæ рох ма уæд, Ирыстонæй кæй стут, уый. Уастырджи — уе ‘мбал! Фæндараст ут!
Кадджын мадзалы ма Ирыстоны сидтон лæппутæн фæндарасты ныхæстæ загътой республикæйы Ветеранты советы сæрдары хæдивæг, булкъон Леонид Зенков, цæгатирыстойнаг организаци «Хæстон æфсымæрдзинад»-ы сæрдар Дзгойты Валери, салдæтты мадæлты республикон комитеты сæрдар Гогаты Лорæ, 19-æм мотоæхсæг дивизийы командиры æххуысгæнæг диныл æууæндджытимæ куысты, сауджын Георгий Хворостянов æмæ республикæйы æфсæддон комиссар, булкъон Мурат Пашаев. Раныхасгæнджытæй алчидæр сидтон лæппутæн бафæдзæхста, цæмæй службæйы рæстæг сæ зæрдыл иудадзыг дарой, кæцæй сты, уый, хъуыды кæной сæ ныййарджыты, мыггæгты, сæ хистæр фæлтæрты, Ирыстоны цæрæг адæмы кадыл.
Уæрæсейы Гæрзифтонг тыхты рæнхъыты хорз кæй службæ кæндзысты, уый тыххæй ард бахæрыны бар лæвæрд æрцыд сидтон Хъантемыраты Къостайæн. Йæ ныфсæвæрæн ныхæсты фæстæ уæлдæфы цалдæр хатты азæлыд сидтонты фидар «Ард хæрæм!»
Кæронбæттæны сидтонтæ æмæ сын фæдараст зæгъынмæ æрбацæуджытæ иумæ систой зæрылдарæн къам.
БАГАТЫ Аврам Къамтæ систа ЦÆГÆРАТЫ Дауыт
