Цæгат Ирыстоны Тæбæхсæуты Балойы номыл паддзахадон Ирон академион театры къухбакæнæн дæр нæ уыд. Сæ уарзон ирон адæмон газет «Рæстдзинад»-æн йæ 95 азы юбилейы фæдыл кадджын бæрæгбонмæ арфæтæ кæнынмæ æрбацыдысты РЦИ-Аланийы Сæргълæууæг БИТАРТЫ Вячеслав, Парламенты Сæрдар Алексей МАЧНЕВ, РЦИ-Аланийы культурæйы министр МИЛДЗЫХТЫ Руслан, Æппæтдунеон æхсæнадон змæлд «Иры Стыр Ныхас»-ы сæрдар КУЧИТЫ Руслан, республикæйы дзыллон хабархæссæг фæрæзты æмæ мыхуыры комитеты сæрдар ФИДАРАТЫ Юри, фысджытæ, уæлдæр ахуыргæнæндæтты разамонджытæ, ахуыргæнджытæ, сыхаг регионтæй, диаспорæтæй минæвæрттæ. Сæрмагонд делегаци æрцыд Хуссар Ирыстонæй «Рæстдзинад» æмæ йæ кæсджытæн сæ цины бон сæ фарсмæ балæууынмæ.
— Абон мах æрæмбырд стæм стыр цины бæрæгбонмæ. Нæ уарзон адæмон газет «Рæстдзинад» 95 азы размæ фыццаг хатт куы рацыди, уæд йæ фыццаг редактор Гæдиаты Цомахъ куыд фыста, афтæмæй, уыцы цины хабар фехъусгæйæ, ирон адæм кодтой куывдтæ, редакцимæ æрвыстой арфæйы фыстæджытæ, — дзырдта йæ арфæйы ныхасы Битарты Вячеслав. — Уæдæй абонмæ «Рæстдзинад» сси æцæг адæмон, йæ номы аккаг газет, рæстæг æмæ адæмы хъæлæс. Нæуæдз фондз азы лæггад кæны адæмæн, Ирыстонæн. Хæссы нæм дунейы хабæрттæ, æргом нын кæны рæстаг цард, тауы зонындзинæдтæ, фидар кæны намыс æмæ рæсугъд æгъдæуттæ, парахат кæны нæ мадæлон æвзаг. Æмæ ацы кадджын бон мæн фæнды бузныг зæгъын газет «Рæстдзинад»-ы кусджыты хистæр фæлтæрæн, уыдонимæ та ныры кусджытæн, уыцы традицитæ дарддæр рæсугъдæй кæй хæссынц. Мæ зæрдæ уын зæгъы ног сфæлдыстадон æнтыстытæ. Цы бирæ хæстæ уæ размæ æвæрут, уыдон уын дзæбæхæй бантысæнт! Уæлахиз æмæ фæрнайдзаг ут! Æмæ дарддæр хæссут ирон дзырды фарн!
Битарты Вячеслав уæлдай арфæ ракодта газеты ветерантæн сæ æрвылбоны хъазуатон куыстæн. Газеты хистæр уацхæссæг Касаты Батрадзы (Барисы) схорзæхджын кодта майдан «Ирыстоны Намысæн»- æй, республикæйы Культурæйы сгуыхт кусæджы ном райстой «Рæстдзинад»-ы сæйраг редакторы хæдивæг Бутаты Эльзæ, хистæр уацхæссæг Дедегкаты Зæлинæ æмæ рекламæйы хайады сæргълæууæг Бызыккаты Земфирæ.
Цæгат Ирыстоны Кады гæххæттытæй хорзæхджын æрцыдысты газеты сæйраг редактор Битарты Маринæ, сæйраг редакторы хæдивæг Колыты Иринæ, бæрнон секретарь Сланты Аслан, бухгалтер Гæззаты Фатимæ, хистæр уацхæсджытæ Абайты Эдуард, Саутæты Тамилæ, Гугкаты Жаннæ, Хетæгкаты Оксанæ æмæ Гасанты Валери.
Хуссар Ирыстоны Парламенты депутат Гæбæраты Юри газеты кусджытæн арфæ ракодта Хуссар Ирыстоны Президент Бибылты Анатолийы номæй æмæ сын балæвар кодта зæрдылдарæн лæвæрттæ. Радзырдта, «Рæстдзинад» абон цы стыр уаргъ хæссы, куыд ахсджиаг у адæмы царды, уый тыххæй.
ЦИПУ-йы президент, «Рæстдзинад»-ы раздæры кусæг Мæхæмæтты Ахуырбег æрымысыд, газеты раздæры кусджытæ цы фыдæбæттæ æмæ тухитæ æвзæрстой, цалынмæ нырыккон техникæ нæ фæзынд, уæдмæ, уый. Боныцъæхтæм-иу иу дамгъæ иннæйы фарсмæ æвæргæйæ газет куыд цæттæ кодтой, цæмæй йæ афойнадыл райсой газеткæсджытæ. — 95 азы сæххæст газет «Рæстдзинад»-ыл, чысыл хъуаг æнæхъæн æнус! — загъта Битарты Маринæ бæрæгбоны кæронбæттæны. — Газет нæ къухтæм куы райсæм, куы дзы бакæсæм фæстаг хабæрттæ, цымыдисаг цаутæ, газеткæсджыты æргом хъуыдытæ, уæд нæ ахъуыды кæнæм йæ хъысмæтыл. Æрмæстдæр фыццаг номырмæ йæ бур сыфтимæ куы æркæсæм, архивы 30-æм азты номырты æмбырдгæндтæ куы рафæлдахæм, уæд ис банкъарæн, цы даргъ æмæ гуыргъахъ фæндагыл рацыд, уый. Æмæ йæ алыхуызон дугивæнты рæстæджытæ кæй нæ бааууон кодтой, уымæн стæм абон æвдисæн. Газет æрмæст йæ кусджытæ нæ аразынц, фæлæ ма газеткæсджытæ. Абон сымахæн дæр у бæрæгбон, нæ зынаргъ газеткæсджытæ, нæ иузæрдион хæлæрттæ, æмæ уын кæнæм арфæтæ. Бæрæгбонмæ æрцæуæг адæм сæ уды фарн æмæ арфæтæй барæсугъд кодтой газеты юбилей.
Газеты кусджытæ бузныг зæгъынц, юбилей ирд æмæ мидисджын кæй руаджы рауадис, уыдонæн. Уым, фыццаджыдæр, арфæйаг у республикæйы Сæргълæууæг Битарты Вячеслав, Культурæйы министрад, йæ сæргъы — Милдзыхты Руслан, Ирон театры аивадон разамонæг Колыты Владислав æмæ театры кусджыты къорд. Уæлдай бузныджы аккаг сты бæрæгбоны сценари ныффыссæг, РЦИ-Аланийы сгуыхт артист Битарты Алыксандр æмæ, йæ фарсмæ цы сфæлдыстадон къордтæ балæууыд, уыдон.
Газет суанг йæ райгуырдæй абонмæ цы фæндагыл рацыд, уыдон къæпхæнгай æвдыст æрцыдысты сценæйы æмæ экраныл. Суанг ма нæ уарзон артист Годжыцаты Исахъ дæр «бабæрæг кодта» мадзал йæ хæрæг «Хъилхъус»-имæ йæ фарсыл постхæссæджы хызын «Рæстдзинад»-ы газеттимæ, афтæмæй. Фарны хабæрттæ кæсут!
УАНИТЫ Оксанæ
