Æнусон цъититæй æмбæрзт Сау хох, Адайы хох, Хъауырбеджы хох æмæ æндæр хæхтæ алырдыгæй æвдисынц сæ цыргъ тигътæ. Се ‘хсæн — райдзаст рæсугъд хохаг хъæу Зæрæмæг. Ам райгуырдис Советон Цæдисы Хъæбатыр, æфсады инæлар Хетæгкаты Иваны фырт Габо. Уый Зæрæмæджы скъола каст фæуыны фæстæ 1919 азы барвæндонæй бацыд Сырх æфсады рæнхъытæм æмæ тох кодта фæсарæйнаг интервентты æмæ бынæттон контрреволюционерты ныхмæ. Хетæджы-фырт архайдта йæ зонындзинæдтæ фылдæр кæныныл æмæ 1922 азы бацыдис Кисловодскы фистæгæфсæддон сырх командирты курсытæм, уый фæстæ та ахуыр кодта Новочеркасскы кавалерион курсыты.
1941 азы райдыдта Фыдыбæстæйы Стыр хæст æмæ Габо хъæбатырæй тох кодта немыцаг-фашистон лæгмарты ныхмæ. Хъахъхъæдта Мæскуы. Архайдта Прибалтикæ, Украинæ, Белоруси суæгъд кæныныл тохты, Берлин байсыныл карз хæсты. Уæлахиз æрхæссæг 1945 азы дыккаг æмбисы та япойнаг æфсадæй сæрибар кодта китайаг горæттæ Харбин æмæ Муданьцзян.
Хæсты фæстæ Советон Цæдисы уыдис дæс æфсæддон зылды. Уыдонæй дыууæйæн командæгæнджытæ уыдысты не ‘мзæххонтæ. Цæгат Кавказы æфсæддон зылды — Советон Цæдисы дыууæ хатты Хъæбатыр, Манголы Адæмон Республикæйы Хъæбатыр, æфсады инæлар Плиты Алыксандры фырт Иссæ, Прибалтикæйы æфсæддон зылды та — Советон Цæдисы Хъæбатыр, æфсады инæлар Хетæгкаты Иваны фырт Габо.
1945 азы Мæскуыйы Уæлахизы историон парады Ирыстоны минæвæрттæ архайдтой дæс æмæ дыууиссæдзæй: рæнхъон салдæттæ, афицертæ æмæ инæлæрттæ. Ам дæр та нæ кадджын, хъæбатыр, номдзыд, фæзминаг лæгтæ цыдысты фыццаг рæнхъыты.
1921 азæй фæстæмæ Габо уыд коммунистон партийы уæнг. Æвзæрст æрцыд СЦКП-йы XXI, XXII, XXIII æмæ XXIV съездты делегатæй, уыд ССР Цæдисы Сæйраг Советы 5-æм, 6-æм, 7-æм æмæ 8-æм æвзæрстыты депутат. Советон Цæдисы Хъæбатыр, æфсады инæлар Хетæгкаты Габойæн йе сгуыхтдзинæдты тыххæй лæвæрд æрцыд бирæ кадджын хæрзиуджытæ: Советон Цæдисы Хъæбатыры «Сыгъзæрин Стъалы», Ленины æртæ ордены, фондз Сырх Тырысайы ордентæ, Суворовы æмæ Кутузовы 1-аг æмæ 2-аг къæпхæнты ордентæ, Сырх Стъалыйы орден, Польшæйы Адæмон Республикæйы дыууæ ордены, Октябры революцийы орден æмæ æндæртæ. Хъыгагæн, æдæппæт 72 азы цæрæнбон йеддæмæ не ‘рхауд Габомæ хъысмæтæй, 1975 азы ахицæн йæ цардæй. Советон Цæдисы Хъæбатырæн, номдзыд æфсадхонæн, куыд æмбæлд, афтæ йæ кадимæ баныгæдтой Мæскуыйы Новодевичьейы уæлмæрды.
Габо æмæ уый хуызæн хъæбатыр æфсадхонтæ кæддæриддæр фæзминаг уыдзысты рæзгæ фæлтæрæн.
СИХЪОТЫ Валодя, фæллойы ветеран
