Знон Дзӕуджыхъӕуы Намысы аллейы кадджын уавӕры байгом, Республикӕ Цӕгат Ирыстон-Аланийы мидхъуыддӕгты оргӕнты кусджытӕй йӕ хӕс ӕххӕстгӕнгӕйӕ чи фӕмард, уыдоны мысӕн Мемориал.
2017 азы райдайӕны республикӕйы мидхъуыддӕгты министр Михаил Скоковы хъӕппӕрисӕй фӕзынд, мидхъуыддӕгты оргӕнтӕй йӕ хӕс ӕххӕстгӕнгӕйӕ чи фӕмард, уыдоны цыртдзӕвӕн реконструкци скӕнын. Фӕлӕ ӕхсӕнадон Советы уӕнгтӕ ӕмӕ, чи фӕмард, уыдоны бинонтимӕ бауынаффӕ кӕныны фӕстӕ сфӕнд кодтой ног Мемориал саразын. Фӕдзырдтой республикӕйы дӕсныдӕр нывгӕнджытӕ, архитектортӕ, скульптортӕм ӕмӕ уыдоны ӕххуысӕй равзӕрстой проект. Мидхъуыддӕгты оргӕнтӕ архивон службӕты фӕрцы сбӕрӕг кодтой, суанг сӕ бинонтӕ, сӕ къабӕзтӕн дӕр зындгонд чи нӕ уыд, ахӕм 78 адӕймаджы нӕмттӕ ӕмӕ сӕ бахастой, мемориалы афӕдзтӕм гӕсгӕ цы номхыгъдтӕ фыст ӕрцыд, уыдонмӕ.
Йӕ хӕстӕ ӕххӕстгӕнгӕйӕ чи фӕмард, уыдоны нӕмттӕ та нымад цӕуынц 1919 азӕй 2014 азмӕ. Мысӕн бон райдыдта Уӕрӕсейы Федерацийы, РЦИ-Аланийы ӕмӕ мидхъуыддӕгты тырысатӕ ӕрбахӕссынӕй ӕмӕ гимнтӕ цӕгъдынӕй. Республикӕйы мидхъуыддӕгты ветерантӕ ӕмӕ службӕгӕнджытӕй уӕлдай Мемориал гом кӕнынмӕ ӕрбацыдысты: Республикӕ Цӕгат Ирыстон-Аланийы Сӕргълӕууӕг Битарты Вячеслав, Уӕрӕсейы Федерацийы Федералон ӕмбырды Федерацийы Советы уӕнг Франц Клинцевич, Хуссар Ирыстоны Президент Бибылты Анатоли, Уӕрӕсейы Федерацийы Федералон ӕмбырды Паддзахадон Думӕйы депутат Тайсауты Хъазыбег, РЦИ-Аланийы Парламенты Сӕрдар Алексей Мачнев.
Битарты Вячеслав зӕрдиаг арфӕ ракодта мидхъуыддӕг- ты оргӕнты службӕгӕнджытӕн, уӕлдайдӕр та сӕ министр Михаил Скоковӕн, ахӕм ахсджиаг куыст кӕй бакодтой, хъӕбатырӕй чи фӕмард, уыдоны мысынӕн ӕмӕ фидӕны фӕлтӕрты патриотон хъомыладыл кӕй архайынц, уый тыххӕй.
Битарты Вячеслав зӕрдӕбын арфӕйы ныхӕстӕ загъта, абон кӕй мысынц, уыдоны ныййарджытӕ, бинонтӕ, хӕстӕджытӕн, ахӕм сӕрӕн, бӕстӕйыл иузӕрдион хъӕбултӕ кӕй схъомыл кодтой, уый тыххӕй.
— Мӕ сӕрӕй ныллӕг кувын уыцы ныййарджытӕн, бӕстӕйы ӕмӕ республикӕйы ӕцӕг патриоттӕ чи схъомыл кодта ӕмӕ сӕ цард снывонд кӕнгӕйӕ абон сабыр, ӕдас цард кӕй фӕрцы кӕнӕм, — загъта Бибылты Анатоли. Зӕрдиаг арфӕтӕ ракодта Михаил Скоковӕн ӕмӕ республикӕйы разамонӕг Битарты Вячеславӕн.
Михаил Скоков арфӕ ракодта мидхъуыддӕгты ӕппӕт оргӕнтӕн, мемориалон комплекс аразыныл чи бакуыста, уыдонӕн, республикӕйы разамындӕн, фӕлмӕн ӕмӕ хъарм ныхӕстӕ загъта, йӕ хӕс ӕххӕстгӕнгӕйӕ йӕ цард нывондӕн чи ӕрхаста, уыдоны хиуӕттӕн.
— Мах хъуамӕ макуы рох кӕнӕм уыдоны рухс нӕмттӕ, уымӕн ӕмӕ уыдон сӕ цард радтой мах сӕраппонд, нӕ фидӕны фӕлтӕры сӕраппонд, — загъта йӕ ныхасы кӕрон Михаил Скоков. Республикӕйы разамындӕн, Михаил Скоковӕн ӕмӕ кадджын мысӕн боны архайджытӕн, республикӕйы ӕппӕт цӕрджытӕн дӕр Федерацийы Советы уӕнгты номӕй арфӕйы ныхӕстӕ загъта Франц Клинцевич. Уӕрӕсейы Федерацийы Паддзахадон Думӕйы депутатты ӕмӕ йӕ разамынды номӕй мысӕн боны архайджытӕн зӕрдиаг арфӕтӕ ракодта Тайсауты Хъазыбег.
Мемориал кадджын уавӕры байгом кӕныны бар лӕвӕрд ӕрцыд Битарты Вячеслав, Франц Клинцевич, Бибылты Анатоли, Алексей Мачнев, Уӕрӕсейы Федерацийы ӕдасдзинады комитеты Цӕгат Ирыстон-Аланийы управленийы хицау, инӕлар-лейтенант Сергей Трушкин, Михаил Скоков, РЦИ-Аланийы Мидхъуыддӕгты оргӕнты ветеранты советы сӕрдар Петр Сазыкин, Дзӕуджыхъӕуы Минӕвӕртты ӕмбырды сӕрдар Хӕдарцаты Махарбег, отставкӕйы инӕлар-майортӕ Бӕтӕгаты Таймураз ӕмӕ Хъӕбӕлоты Русланӕн. Мемориалы раз ӕнусон арт ссудзыны кадджын бар лӕвӕрд ӕрцыд, йӕ хӕстӕ ӕххӕстгӕнгӕйӕ фӕмард уӕвӕг милицӕйы хистӕр сержант Тедеты Алыксандры байзӕддаг чысыл Миланӕ, Петр Сазыкин ӕмӕ пъӕлицӕйы лейтенант Малиты Эльбрусӕн.
Мемориалы ӕнусон кадджын номхыгъдмӕ хаст чи ӕрцыд, уыцы зынгхуыст пъӕлицӕйӕгты ныййарджыты номӕй раныхас кодта милицӕйы зынгхуыст дӕлбулкъон Мецъаты Маркы мад Светланӕ. Уый арфӕ ракодта Михаил Скоковӕн ӕмӕ фӕсидт йӕхи ‘мхуызон мадӕлтӕ ӕмӕ къабӕзтӕм, цӕмӕй фидар фӕлӕууой ӕмӕ сӕрыстыр уой сӕ зынгхуыст кӕстӕртӕй.
Мидхъуыддӕгты абоны службӕгӕнджытӕ ныффыстой ныстуан фидӕны фӕлтӕрмӕ ӕмӕ йӕ бавӕрдтой Мемориалы фарсмӕ.
Мысӕн боны архайджытӕ, сӕ хӕстӕ ӕххӕстгӕнгӕйӕ чи фӕмард, уыдоны номыл Мемориалыл сӕвӕрдтой веноктӕ ӕмӕ дидинджытӕ.
КАСАТЫ Батрадз Къамтӕ систа КЪÆБЫСТЫ Харитон
