Терроризмы ныхмӕ къамисы кӕронбӕттӕн ӕмбырды сӕрдариуӕг кодта РЦИ-Аланийы Сӕргълӕууӕг БИТАРТЫ Вячеслав. Къамисы уӕнгтӕ: РЦИ-Аланийы Парламенты Сӕрдар Алексей МАЧНЕВ, нӕ республикӕйы Хицауады Сӕрдар ТУСКЪАТЫ Таймураз, йӕ хӕдивӕг ТОМАЙТЫ Ирбег, УФ-йы ӕдасдзинады комитеты РЦИ-Аланийы управленийы сӕргълӕууӕг Сергей ТРУШКИН, РЦИ-Аланийы прокурор Владимир ВЕКШИН, барадхъахъхъӕнӕг хицаудзинады оргӕнты бӕрнон кусджытӕ ӕрныхас кодтой республикӕйы оперативон уавӕрыл. Йӕ бӕрӕггӕнӕнтӕ куыд ӕвдисынц, афтӕмӕй боныхъӕды аххосӕгтӕм гӕсгӕ Уӕрӕсемӕ нӕ республикӕйы уылты уӕзласӕн машинӕтӕн се ‘ппӕтӕн цӕуыны бар нӕй.
Уӕзласӕн машинӕтӕ стыр къордтӕй лӕууынц Дзӕуджыхъӕуы фӕсвӕд районты ӕмӕ фӕлладуадзӕн бынӕттӕм хӕстӕг фӕзуӕтты. Уымӕ гӕсгӕ, къамисы уӕнгтӕ рахастой уынаффӕ Дзӕуджыхъӕуӕй ӕппӕт уыцы машинӕтӕ айсын ӕмӕ сӕ Кировы районы бирӕфадатджын лӕууӕн бынатмӕ арвитын. Ахӕм бынат ма ис Дзӕуджыхъӕумӕ бацӕуӕны дӕр. Битарты Вячеслав ма куыд банысан кодта, афтӕмӕй, уыцы уӕзласӕн машинӕтӕ ӕвзӕрырдӕм ахадынц Дзӕуджыхъӕуы ӕмӕ ӕмткӕй республикӕйы санитарон уавӕрыл, сӕ аххосӕй арӕх сӕвзӕры ӕндӕр зындзинӕдтӕ дӕр, уӕлдайдӕр, уазал рӕстӕг фӕндӕгтӕ бырынцъаг куы вӕййынц, уӕд.
Къамисы ӕмӕ оперативон штабы уӕнгтӕ ма ӕркастысты, Ног азы ӕмӕ Цыппурсы бӕрӕгбӕтты цавӕр ӕдасдзинады мадзӕлттӕ сараздзысты, уымӕ. 19 декабрмӕ уыцы бӕрӕгбӕттӕн арӕзт ӕрцӕудзӕн сӕрмагонд пълан. Цы бынӕтты арӕзт цӕудзысты, уыдон та рагагъоммӕ сбӕрӕг кӕндзысты мидхъуыддӕгты ӕмӕ ӕнӕнхъӕлӕджы уавӕрты министрадты кусджытӕ.
22 декабры Дзӕуджыхъӕуы байгом уыдзӕн Ног азы сӕйраг наз бӕлас. Уый фӕстӕ Цӕгат Ирыстонӕй ӕмӕ Хуссар Ирыстонӕй 49 сывӕллоны ацӕудзысты Кремлы Ног азы бӕрӕгбоны архайынмӕ.
Ног азы ӕмӕ Цыппурсы бӕрӕгбӕтты ӕхгӕд бӕстыхӕйтты пайдагӕнӕн нӕ уыдзӕн пиротехникӕйӕ ӕмӕ фейерверктӕй. Ныридӕгӕн барадхъахъхъӕнӕг оргӕнтӕ цы профилактикон рейдтӕ сарӕзтой, уыдонмӕ гӕсгӕ базаргӕнӕн бынӕттӕй ист ӕрцыд фӕндзай мины пиротехникон иуӕджы, ӕнӕ бардӕттӕг документтӕй сӕ кӕй уӕй кодтой, уый тыххӕй. — Бӕрӕгбӕтты рӕстӕг зынгсирвӕзтытӕй ӕмӕ ӕндӕр ӕбуалгъ цаутӕй хи бахизыны нысанимӕ хъуамӕ училищеты, техникумты арӕзт ӕрцӕуа ӕмбарынгӕнӕн мадзӕлттӕ, — загъта ӕмбырды кӕрон Битарты Вячеслав.
