1979 азы сыхаг Афганистаны райдыдта хицаудзинадыл тох. ССР Цæдис рахæцыд Афганистаны адæмон хицаудзинады фарс. Сæххæст æй кодтой 15 мин адæймаджы салдæттæ, афицертæ æмæ инæларты царды аргъæй.
Афганистаны хæсты Ирыстонæй уыдис 1200 адæймаджы. Уыдонæй 56 лæппуйы душмантимæ тохы хъæбатырæй фæмард сты, дыууæсæдæйы бæрц та систы инвалидтæ.
Булкъон Тобойты Олег Дзæуджыхъæуы æфсæддон командон училище каст куы фæцис, уæд йе службæйы фыццаг къахдзæфтæ акодта Прибалтикæйы, уыдис 12-æм гвардион дивизийы ротæйы командир, уырдыгæй йæ интернационалон хæс æххæст кæнынмæ 1985 азы бафтыд Афганистанмæ. Лæгдзинад æвдисгæйæ, 26-аздзыд ирон лæппу уæззау цæфтæ фæцис, 37-æм танкон полчъы ротæйы командир афгайнаг горæт Баграмы федта æмбæлтты мæлæт, фæлæ йæ царды зындзинæдтæ бахсыстой, бирæ азты архайдта нæ бæстæйы æдасдзинад æмæ æфсæддон цæттæдзинад фидар кæныныл.
Тобойты Олег æмæ ма йæ интернационалон хæс чи æххæст кодта Афганистаны, уыцы лæппутæн, Республикон æфсæддон комиссарады, Советон æфсæдтæ Афганистанæй куы рацыдысты, ууыл 30 азы кæй сæххæст, уый фæдыл æмбырды радтой юбилейон майдантæ.
Арфæйы ныхæстæ сын загъта РЦИ-Аланийы æфсæддон комиссар, булкъон Марат Пашаев. — Æз кæддæриддæр стыр аргъ кæнын æфсæддон адæймагæн, афицерæн, сержантæн, рæнхъонæн. Уæ хъæбатырдзинады тыххæй уын нæ сæртæй ныллæг кувæм. Сымах кæнут стыр патриотон-хъомыладон куыст, уæ цард дæнцæгæн хæссинаг у рæзгæ фæлтæрæн, — загъта æфсæддон комиссар æмæ 30 адæймагæн радта юбилейон майдантæ.
Адæмты хæлардзинады республикон хæдзары номæй æфсæддонтæ-интернационалисттæн арфæйы ныхæстæ загъта Хъайтыхъты Тамарæ.
Кæронбæттæны иумæ зæрдылдарынæн систой сæ къам.
ГУГКАТЫ Жаннæ Къам систа КЪÆБЫСТЫ Харитон
