Зындгонд куыд у, афтæмæй 14-15 февралы горæт Сочийы цæудзæн инвестицион форум «Сочи-2019». Уыцы уæрæх экономикон равдысты архайдзæн Республикæ Цæгат Ирыстон-Аланийы делегаци дæр. Уый тыххæй фехъусын кодта РЦИ-Аланийы Сæргълæууæджы æмæ РЦИ-Аланийы Хицауады пресс-службæ.
Пресс-службæйы минæвары ныхасмæ гæсгæ, республикæйы экспозици форумы архайджыты базонгæ кæндзæн Цæгат Ирыстоны агропромышленнон, туристон æмæ промышленнон хъомысимæ, æвдыст дзы æрцæудзысты цымыдисаг инвестицион проекттæ.
Цæгатирыстойнаг делегацийæн разамынд дæтдзæн республикæйы Сæргълæууæг Битарты Вячеслав. Делегацийы уæнгтæ уыдзысты: Хицауады Сæрдар Тускъаты Таймураз, Хицауады Сæрдары хæдивæг — УФ-йы Президенты цур РЦИ-Аланийы Æххæстбарджын минæвар Дзанайты Барис, республикæйы экономикон рæзты министр Томайты Хъазыбег, стæй амалхъомады минæвæрттæ Цæгат Ирыстонæй архайдзысты форумы æппæт мадзæлтты дæр, сæрмагонд фембæлдтытæ сын уыдзæн инвестицион компаниты кусджытимæ.
Уымæй уæлдай, цæгатирыстойнаг куыстуæтты продукци æвдыст æрцæудзæн Цæгат Кавказы хъуыддæгты фæдыл министрады иумæйаг экспозицийы дæр. Уыцы стендты æвдыст цæудзæн Цæгат Кавказы федералон зылды регионты экономикон æмæ инвестицион хъомыс.
Инвестицион форум «Сочи-2019» цæудзæн Олимпаг парчы сæйраг медиацентры. Уæрæсейы Федерацийы Хицауады æххуысæй равдыст бацæттæ кодта фонд «Росконгресс».
Нæ уацхæссæг
