Цæгат Ирыстоны Хетæгкаты Къостайы номыл паддзахадон университеты конференцитæ аразæн залы уыд Колмогоровы бакастыты уæлахиздзаутæн кадгæнæн изæр. Архайдтой дзы Дзæуджыхъæуы наукон центры сæргълæууæг, физикон-математикон наукæты доктор, профессор КЪУСРАТЫ Анатоли, Республикæ Цæгат Ирыстон-Аланийы ахуырад æмæ наукæйы министры хæдивæг АЛЫККАТЫ Алан, Хуссайраг математикон институты минæвæрттæ, Цæгат Ирыстон-Аланийы фæсивæды хъуыддæгты комитеты разамынд, ацы зонадон ерысы уæлахиздзаутæ, сæ ахуыргæнджытæ æмæ ныййарджытæ.
Ацы аз æппæтуæрæсеон фæндзæм математикон конкурс Колмогоровы бакастыты республикон къæпхæны архайдта 200 лæппу æмæ чызджы. Уыдон сæ зонындзинæдтæ жюрийы тæрхонмæ рахастой сæрмагонд секциты. Кастысты докладтæ æмæ рефераттæ информатикæйæ, биологийæ, математикæйæ, химийæ. Афтæ ма бакастытæм гæсгæ арæзт æрцыд Чебышевы олимпиадæйы дистанцион къæпхæн. Уым та архайдта 150 ахуырдзауы. Бакастытæм гæсгæ ма республикæйы ахуырдзау фæсивæды ‘хсæн арæзт æрцыдысты командон ерыстæ «Зымæгон математикон регатæ» дæр.
Æппæт уæлахиздзаутæ æмæ Колмогоровы фæндзæм æппæтуæрæсеон бакастыты архайджытæ райстой уæлахиздзауты дипломтæ æмæ, ацы наукон ерысы кæй архайдтой, уый тыххæй сертификаттæ æмæ Кады гæххæттытæ. Æппæтуæрæсеон математикон зонадон ерыс Колмогоровы бакастыты республикон конкурстæ саразджытæ куыд зæгъынц, афтæмæй азæйазмæ сæ архайджыты нымæц рæзы, жюрийы тæрхонмæ цы зонадон куыстытæ рахæссынц, уыдон та сты мидисæй хъæздыг, наукон æгъдауæй бæлвырд фактты бындурыл фыст.
АНВАРАТЫ В. Къам систа ЦÆГÆРАТЫ Д
