Цæгат Ирыстоны Сæргълæууæг БИТАРТЫ Вячеславæн республикæйы Хицауады Сæрдары хæдивæг — æнæниздзинад хъахъхъæнынады министр ГОДЖЫЦАТЫ Тамерланимæ цы кусæг фембæлд уыд, уым бæстон ныхас рауад национ проекттæ æххæст кæныныл, стæй комкоммæ — æнæниздзинад хъахъхъæнынады къабазы райрæзтыл.
Уый тыххæй фехъусын кодта РЦИ-Аланийы Сæргълæууæджы æмæ РЦИ-Аланийы Хицауады пресс-службæ. Зындгонд куыд у, афтæмæй фыццаградон национ проект «Æнæниздзинад» æххæстгонд цæудзæн æхсæз азы дæргъы, программæйы мадзæлттæ аххæсдзысты аст алыхуызон къабазыл. Цæгат Ирыстоны уыцы проекты мадзæлттæ æххæстгонд цæудзысты авд къабазы.
Годжыцаты Тамерланы ныхасмæ гæсгæ, хæстæгдæр рæстæг республикæ федералон ведомствотимæ бафысдзæн цалдæр сæрмагонд бадзырды. Уыцы документты бæлвырдгонд æрцæудзысты национ проект «Æнæниздзинад» æххæст кæныны æппæт мадзæлттæ дæр. Уыцы программæйы фæрцы зынгæ фæхуыздæр уыдзæн фыццаградон медикон-санитарон æххуыс, ахадгæдæр уыдзæн зæрдæйы, дадзинты, стæй онкологион низтимæ тох, æнæниздзинад хъахъхъæнынады кусæндæттæ бæстондæр ифтонггонд цæудзысты хъæугæ медицинон техникæйæ, фылдæр æргом здæхт цæудзæн дохтыртæ æмæ иннæ специалистты профессионалон цæттæдзинадмæ.
Уый фæстæ министр радзырдта, грипп æмæ æндæр хæцгæ низты ныхмæ цы карантинон мадзæлттæ арæзт цæуынц, рынчындæттæ æмæ иннæ медицинон кусæндæттæ хостæй куыд ифтонг сты, тарнизы ныхмæ диспансер æмæ республикæйы районты фелсырон-акушерон пунктты арæзтады, стæй æндæр ахсджиаг хъуыддæгты тыххæй. Куыд загъдæуыд, афтæмæй байгом кæнынмæ ныридæгæн цæттæ сты Редант æмæ Цъæйы фелсырон-акушерон пункттæ (сæ арæзтадæн фæрæзтæ радих кодтой республикон бюджетæй). Мартъийы та байгом уыдзæн тарнизы республикон ног диспансер.
— Цæгат Ирыстоны æнæниздзинад хъахъхъæнынады къабазы райрæзт у нæ сæйрагдæр нысантæй иу. Республикæйы цæрджытæн хъуамæ уа хæрзхъæд медицинон лæггæдтæ райсыны фадат. Æппæты раздæр банывыл кæнын хъæуы фыццаградон медикон-санитарон æххуысы системæйы архайд. Уыимæ, дæрддзæф хъæуты дæр хъуамæ кусой фелсырон — акушерон пункттæ, — бафиппайдта Битарты Вячеслав.
Фембæлды рæстæг каст æрцыд æндæр фарстатæм дæр.
Нæ уацхæссæг
