Зындгонд куыд у, афтæмæй 14 — 15 февралы горæт Сочийы йæ куыст кодта Уæрæсейы инвестицион форум «Сочи-2019». Уыцы уæрæх экономикон фембæлды архайдта Республикæ Цæгат ИрыстонАланийы официалон делегаци БИТАРТЫ Вячеславы разамындæй.
Дыууæ боны дæргъы Цæгат Ирыстоны минæвæрттæн уыд бирæ алыхуызон фембæлдтытæ федералон министрадтæ æмæ ведомствæты минæвæрттимæ, инвестицион компанитæ æмæ куыстуæтты разамонджытимæ.
Зæгъæм, форумы сæйрагдæр мадзæлттæй иу — пленарон æмбырд «Æнтыстдзинады æууæлтæ: хъæппæристæ, кадртæ, профессионалон дæсныдзинад»-ы архайдта Битарты Вячеслав. Премьер-министр Дмитрий Медведев сæрдариуæг кæм кодта, уыцы æмбырды архайджытæ бæстон æрдзырдтой бирæ ахсджиаг фарстатыл. Уыдоны нымæцы — фыццаградон национ проекттæ æххæст кæнын дæр. Æмбырды куыд загъдæуыд, афтæмæй уæрæсейаг регионтæ бавнæлдтой национ проекттæ æххæст кæнынмæ.
Цæгат Ирыстоны дæр бирæ ахсджиаг куыстытæ конд æрцæудзæн национ проект- ты фæлгæты. Зæгъæм, республикæйы арæзт æрцæудзысты фелсырон-акушерон пункттæ, медицинон уагдæттæ, сывæллæтты рæвдауæндæттæ, скъолатæ, спортивон фæзтæ æмæ афтæ дарддæр. Уыцы ахсджиаг объектты проекттæ ныридæгæн цæттæгонд цæуынц.
Фæстæдæр Цæгат Ирыстоны Сæргълæууæг Битарты Вячеславæн фембæлд уыд автономон æнæкоммерцион организаци «Социалон къабазмæ инвестициты агентад»-ы æх- хæстгæнæг директор Илья Ковалевимæ. Фембæлды рæстæг куыд загъдæуыд, афтæмæй ацы компани кусы бирæ ахсджиаг къабæзты. Цæгат Ирыстонимæ организаци æмгуыстад кæндзæн «тагъд медицинон æххуыс»-ы хæд- тулгæтæ ногтæй раивыны хъуыддаджы. Битарты Вячеслав æмæ Илья Ковалев куыд баныхас кодтой, афтæмæй дыккаг къæпхæны компанийы æххуысæй лыггонд æрцæудзысты æнæниздзинад хъахъхъæнынады къабазы архайд фæхъомысдæр кæныны æндæр фарстатæ дæр. Уый фæдыл республикæ æмæ компанийы минæвæрттæ бафыстой сæрмагонд бадзырд.
Битарты Вячеславæн фембæлд уыд компани «ДжиИ Хэлскеа»-йы генералон директор Нинæ Канделакиимæ дæр. Ацы компани дæр кусы медицинон лæггæдты къабазы. — Цæгат Ирыстоны стыр æргом здæхт цæуы æнæниздзинад хъахъхъæнынады къабаз райрæзын кæнынмæ. Уыцы æууæл хынцгæйæ, махæн вазыгджын у, регионтæм нырыккон медицинон ифтонггæрзтæ кæй фæрцы хæццæ кæнынц, ахæм компанитимæ æмгуыстад, — фæнысан кодта республикæйы разамонæг.
Республикæ æмæ компанийы минæвæрттæ бæлвырд æрдзырдтой регионы æнæниздзинад хъахъхъæнынады къабазы нывылдзинадæн ахъазгæнæг мадзæлттыл. Æмархайды фæдыл рагагъоммæ цæттæгонд æрцыд бадзырды проект. Æмæ ныр ацы фембæлды документ сфидар кодтой.
Цæгат Ирыстоны минæвæрттæн форумы фæлгæты уыд æндæр цымыдисаг æмæ пайдайаг фембæлдтытæ дæр.
