Ацы аз Дзæуджыхъæуы Æхсæнадон советы президиумы фыццаг æмбырд гом кæнгæйæ, Советы сæрдар Михаил ШАТАЛОВ куыд загъта, афтæмæй муниципалон уынаффæйадон гæххæттытыл кусыны рæстæг коллегион æхсæнадон оргæны уынаффæты ахадындзинад фылдæрæй-фылдæр кæны.
— Æхсæнадон советы кад Советы уæнгты дæсныдзинад æмæ бæрнондзинадæй аразгæ кæй у, уый нымайгæйæ, Советы уæнгты ног номхыгъдмæ бахæссинаг кандидатурæтыл æрныхас кæныны размæ æз хæссын уæлдæрамынд бындурæвæрæг миниуджытæ нымайыны фæндон, дзыллæтæ номхыгъдмæ бахæссинаг адæймаджы зонынц æви нæ, уый дæр нымайгæйæ, — загъта М. Шаталов.
Амынд æууæл хынцгæйæ, Æхсæнадон советы уагæвæрд æххæст кæныны фадат кæмæн нæй, Советы секретар Хъайтыхъты Тамарæйæн бафæдзæхстой 10 боны æмгъуыдмæ Æхсæнадон советы ахæм иуæй-иу уæнгты Советы уæнгты номхыгъдæй фæцух кæныны æмæ алыхуызон æхсæнадон организацитæ кæй амонынц, Советы уæнгты номхыгъдмæ ахæм ног адæймæгты бахæссыны тыххæй фæндæттæ муниципалон иугонд Дзæуджыхъæуы сæргълæууæг Хæдарцаты Махарбегмæ барвитын.
Цæгат Ирыстоны паддзахадон хицаудзинад æмæ бынæттон хиуынаффæйады оргæнты куыстмæ æхсæнадон цæстдардæн фадæттæ саразыны фæдыл æхсæнадон организациты куыст фæрæвдз кæнынæн Цæгат Ирыстоны Сæргълæууæг Битарты Вячеслав ивддзинæдтæ кæдæм бахаста, ацы аз ноггонд Æхсæнадон совет кусдзæн ахæм пъланмæ гæсгæ.
Ацы аз ирон литературæйы бындурæвæрæг Хетæгкаты Къостайы райгуырдыл 160 азы, атомон нау «Арктикæ»-йы таурæгъон капитан Кучиты Юрийы райгуырдыл та 100 азы кæй æххæст кæны, уыдæттæ нымайгæйæ, Михаил Шаталовы фыццаг хæдивæг Огъуаты Алан бахаста Æхсæнадон советы куысты пъланмæ срастгæнинæгтæ бахæссыны фæндон. — Ахуырдзаутæ нæ горæты скъолаты историйæ цы ахуырад райсынц, уый хæрзхъæддзинад мæ сагъæсы æфтауы. Канд хистæркъласонтæ нæ, фæлæ истори æмæ æхсæнадзонынады иуæй-иу ахуыргæнджытæ дæр бæстæйы зындгонд паддзахадон архайджыты нæмттæ æмæ историон цауты азтæ нæ зонынц, — загъта Огъуайыфырт.
Ныхас кæнгæйæ, Советы уæнг Бедойты Руслан бахаста Ирыстонæй рацæуæг Советон Цæдисы Хъæбатырты нæмттæ номарæн «Барбашово поле»-йы æххæстæй ныффыссыны фæндон.
Æмбырды кæрон Михаил Шаталов куыд загъта, афтæмæй, скъолаты ахуырады къæпхæн фæуæлдæр кæнынæн чи фæахъаз уыдзæн, ахæм мадзæлттыл бакусын æмбæлы. Бахастæуыд ацы фарстайы фæдыл сæрмагонд æмбырд саразыны фæндон. Историйы ахуыргæнджыты Цæгат Ирыстоны паддзахадон университеты кæй цæттæ кæнынц, уый нымайгæйæ, Михаил Шаталов бахаста ацы цæттæкæнынады хæрзхъæддзинад биноныг раиртасынмæ экспертты æрбахоныны фæндон, иннæ аз университетыл 100 азы кæй сæххæст уыдзæн, уый дæр нымайгæйæ.
Æхсæнадон советы пресс-службæ
