Ацы бонты Ирыстонмæ сластой, ног промышленнон куыстуат «Ирыстоны сæуæхсид»-ы цехты цы технологон ифтонггæрзтæ сæвæрдзысты, уыдон. Уый тыххæй фехъусын кодта РЦИ-Аланийы Промышленност æмæ транспорты министрады пересс-службæ.
Зындгонд куыд у, афтæмæй тагъд рæстæг Дзæуджыхъæуы кусын райдайдзæн электротехникон приборты завод «Ирыстоны сæуæхсид». Ног куыстуат æрбынæттон уыдзæн, завод «Бином»-ы раздæры цехтæй иуы.
Куыстуаты генералон директор Геннадий Ненашев куыд радзырдта, афтæмæй бынатмæ схæццæ сты станоктæ, компрессортæ æмæ æндæр технологон кусæнгæрзтæ. Цалынмæ ифтонггæрзтæ сæ бынаты сæвæрой æмæ сæ кусынæввонг скæной, уæдмæ ахуыртæ араздзыстæм не специалисттæн.
«Фыццагдæр райсдзыстæм, ныронг «Бином»-ы чи куыста, уыцы адæмы. Фыццаг къæпхæны фæнд кæнæм 30 кусæджы райсын, фæстæдæр заводы специалистты нымæц схæццæ уыдзæн 80 адæймагмæ. Куыстад куы рапарахат кæнæм, уæд, кæй зæгъын æй хъæуы, фæфылдæр уыдзæн коллективы уæнгты нымæц дæр», — загъта Геннадий Ненашев.
Генералон директоры ныхасмæ гæсгæ, ныртæккæ цалцæг кæнынц цехы сæр, стæй уадзынц электрон тыхдæттæн ног хæтæлтæ. Куыстуаты фыццаг продукци уыдзысты хæдзары ауындзгæ рухсгæнæн «Джимара» æмæ уынджы цырагъ «Сириус». Фæстæдæр продукцийы хуызтæ фæфылдæр уыдзысты.
Нæ уацхæссæг
