Арфæ уын кæнын Фыдыбæстæ хъахъхъæнæджы бæрæгбоны фæдыл!
Цытджын Уæрæсейæн йæ дæргъвæтин историимæ ацы бæрæгбон уæлдай ахсджиагдæр у. Æппæт рæстæджыты дæр райгуырæн зæхх цавæрфæнды æрбабырстытæй хъахъхъæнын уыд æмæ у, йæ фыды къона зынаргъ кæмæн у, йæ хиуæтты чи хъахъхъæны æмæ фидæны рæзгæ фæлтæртыл чи ауды, уый табуйаг хæс.
Мах уыцы бон æрымысæм, Фыдыбæстæйы Стыр хæсты нæ Райгуырæн бæстæйы сæрибардзинад æмæ хæдбардзинады сæраппонд чи фæмард, уыцы хъæбатырты се ‘ппæты дæр, кад кæнæм, абон бæстæйы Гæрзифтонг тыхты чи службæ кæны æмæ Фыдыбæстæ хъахъхъæнæджы кадджын ном чи хæссы, уыдонæн.
Цæгат Ирыстоны хъайтар азфысты ис, се ‘мзæххонтæ стыр кад кæмæн кæнынц, республикæйы æмæ Уæрæсейы æфсæддон намысмæ йæ лæгдзинад, фидардзинад æмæ хъæбатырдзинадæй бирæ ирд сыфтæ чи бахаста, æнæхъæн фæлтæрты ахæм сыгъзæрин нæмттæ.
Сæрыстыр стæм нæ республикæйы ныры æрыгон минæвæрттæй дæр, æфсæддон æхсардзинады традицитæ дарддæр чи æххæст кæны, Райгуырæн бæстæйыл иузæрдиондзинады тыххæй ард чи бахордта, уыдонæй. Ацы бæрæгбоны кад скæнæм, æфсады чи службæ кодта æмæ дзы абон чи службæ кæны, уæрæсейæгты æнцойад æмæ сабыр цард, йæ уарзон бæстæйы — æппæты тыхджындæр æмæ хъомысджындæр паддзахады интерестæ чи хъахъхъæны, уыдонæн.
Кад æмæ намыс, не ‘хсæн чи нал ис, уыцы хъæбатыртæн, æнæниздзинад æмæ фидардзинад — ветерантæн, амонд æмæ æнтыстдзинæдтæ — се ‘фсæддон царды Гæрзифтонг тыхты службæгæнæг салдæттæ æмæ афицертæн!
Бæрæгбоны хорзæх уæ уæд, зынаргъ æмзæххонтæ, Фыдыбæстæ хъахъхъæнæджы боны хорзæх! Хъæлдзæгдзинад æмæ хорздзинæдтæ — уе ‘ппæтæн дæр, сабырдзинад æмæ нывылад нæ уарзон республикæйæн! БИТАРТЫ Вячеслав, Республикæ Цæгат Ирыстон-Аланийы Сæргълæууæг
