РЦИ-Аланийы Парламенты Советæн уыд радон æмбырд. Амыдта йæ Парламенты Сæрдар Алексей МАЧНЕВ.
Советы уæнгтæ цы фарстатæм æркастысты, уыдонæн сæ фылдæр бацæттæ кодта Парламенты закъонады, закъонæвæрынады æмæ бынæттон хиуынаффæйады комитет. Комитеты сæрдар Ортабайты Тимур Советы уæнгты размæ рахаста Уæрæсейы Федерацийы æмæ Республикæ Цæгат Ирыстон-Аланийы закъонты проекттæм ивддзинæдтæ бахæссыны тыххæй фæндæттæ. Депутаттæ рахæцыдысты «Республикæ Цæгат Ирыстон-Аланийы Кадджын гражданины номы тыххæй» Республикæ Цæгат Ирыстон-Аланийы закъоны проектмæ ивддзинæдтæ бахæссыны фæндоны фарс. Ныхас цæуы ууыл, æмæ ацы кадджын номхæссæгæн æрвылмæй йæ пенсимæ уæлæмхасæн фыст цæмæй цæуа 5 мин сомы, нырмæ цы 3 мин сомы фыстой, уый бæсты.
Парламенты цæрæнуæтты-коммуналон хæдзарады æмæ арæзтадон политикæйы комитеты сæрдар Бокоты Эльбрус фыццаг бакасты æркæсынмæ рахаста «Республикæ Цæгат Ирыстон-Аланийы территорийыл чи ис, уыцы бирæфатерон хæдзæртты иумæйаг исбоны бындурон цалцæг скæныны тыххæй» Республикæ Цæгат Ирыстон-Аланийы 4 закъонмæ ивддзинæдтæ бахæссыны тыххæй» Республикæ Цæгат Ирыстон-Аланийы закъоны проект.
Уæрæсейы Федерацийы Президент йæ Указæй 2018-2027 азтæ расидт «Дестилетие детства», ома, уыцы азты уæлдай фылдæр æргом здæхт цæудзæн рæзгæ фæлтæры æнæниздзинад хъахъхъæнынмæ æмæ фидар кæнынмæ. Уыцы нысанимæ республикæйы Парламенты наукæйы, ахуырады, культурæ æмæ информацион политикæйы комитеты сæрдар Еленæ Князева депутатты размæ рахаста «Уæрæсейы Федерацийы Ахуырады тыххæй» федералон закъоны 67 статьямæ ивддзинæдтæ бахæссыны тыххæй» федералон закъоны проект. Ныхас дзы цæуы ууыл, цæмæй астæуккаг ахуыргæнæндæтты райдайæн кълæсты ахуырдзаутæн æнæмæнг уа нывыл хæринаг, уыимæ æхсыр, æхсыры продукттæ æмæ дыргъты дон. Хъуыддаг æххæстгонд цæудзæн Уæрæсейы Федерацийы бюджеты хардзæй. Сæйрагдæр та уый у, æмæ продукци хъаумæ конд уа æрмæстдæр уæрæсейаг хомагæй.
Депутаттæ ма æркастысты республикæйы социалон-экономикон æмæ æхсæнадон-политикон цардимæ баст къорд закъоны проекттæм.
Нæ уацхæссæг
