Национ наукон библиотекæйы уыд, Иры номдзыд хъæбул Хетæгкаты Къостайы райгуырды 160 азы юбилейы кадæн йе ‘мдзæвгæ «Ныстуан» 105 æвзагыл мыхуыргонд кæм æрцыд, уыцы чиныджы презентаци. Сарæзта йæ ацы библиотекæйы директоры хæдивæг, РЦИ-Аланийы культурæйы сгуыхт кусæг БИБУАТЫ Иринæ
Ахæм æмбырдгонд ма амæй размæ мыхуыры рацыд 2009 æмæ 2014 азты (Къостайы юбилейтæм). Фыццаг чиныджы презентаци уыд Мæскуыйы УФйы паддзахадон библиотекæйы, нæ республикæйы Культурæйы бонтæ бæрæг кæныны рæстæджы. Æртæ рауагъды дæр рухс федтой чиныгуадзæн «Сис æмæ хъисын»-ы. Ног чиныджы презентацийы архайдтой культурæ æмæ аивады, ахуырады кусджытæ, студенттæ, скъоладзаутæ, чиныгкæсджытæ.
Раныхас дзы кодта æмæ æмбырдгондыл куыд куыста, уый тыххæй радзырдта Бибуаты Иринæ. Уый фæстæ та афæлгæст сарæзта, чиныджы Къостайы æмдзæвгæ «Ныстуан» цы æвзæгтæм тæлмацгонд æрцыд, уыдоны равзæрды историйыл.
АСТАНТЫ А. Къамтæ систа ЦÆГÆРАТЫ Дауыт
