Цхинвалы Колыты Аксойы номыл Аивæдты лицейы 6-æм къласы ахуыргæнинаг Дзабиты Георги хæрзчысылæй равзæрста йæ фидæны дæсныйад, æмæ йын ныридæгæн ис æнтыстытæ. Æртæ азы йыл куы цыд, уæд райдыдта цымыдис кæнын нывкæнынадмæ. Æппынæдзух домдта кърандæстæ, фæлæ ма чысыл кæй уыд, уымæ гæсгæ йын йæ фæндонæн уæлдай нысаниуæг нæ лæвæрдтой йæ ныййарджытæ.
Георгийыл цыппар азы дæр æххæстæй нæма цыд, афтæмæй сныв кодта цавæрдæр тымбылæг, йæ мидæг уыд дамбаца, æддейæ йыл æруагъта дæргъæй-дæргъмæ сырх хахх. Йæ мад Пæррæстаты Зæринæ куыд зæгъы, афтæмæй йæ куы бафарстой, цы нысан кæны йæ конд ныв, уæд сæ йæ дзуапп бафтыдта дисы. «Мæнмæ афтæ фæкаст, кæмдæр федта ахæм ныв æмæ йæ уырдыгæй раныв кодта, фæлæ мын куы загъта, зæгъгæ, уый нысан кæны, хæдзары хæцæнгарз дарæн нæй, уый тæссаг хъуыддаг у, уæд мæ дисæн кæрон нал уыд. Ахæм æнахъом саби уыдæттыл куыд хъуамæ хъуыды кæна»,— зæгъы Зæринæ.
Кæй зæгъын æй хъæуы, арæхстдзинадæй дарддæр Георги ам равдыста йæ арф хъуыдыкæнынад дæр.
Сабиты рæвдауæндоны дæр Георгийы конд нывтæ кæддæриддæр хицæн кодтой куыд сæ аивдзинадæй, афтæ сæ мидисæй дæр, æмæ-иу ын сæ хъомылгæнджытæ сæвæрдтой хуыздæр куыстыты æмрæнхъ.
Райдайæн кълæсты ахуыр кæнгæйæ, Георги ноджы хуыздæр базыдта ахорæнтæ æвзарын, семæ архайын, æмæ йæ куыстытæ дæр бæрæг фæхуыздæр сты. Дыккæгæм къласы кодта йæ радон цымыдисаг ныв «Чындзæхсæв». Уым æвзонг нывгæнæг æвдисы йæ æвæрццæг ахаст рагон ирон æгъдæуттæм.
Ныв «Чындзæхсæв»-ы равдыста ивгъуыд æнусты ирон чындзæхсæв рагирон хъæуы. Нывы фæлгонцтæй иу — ирон чындзы уæздан бакастæй æрыгон авторæн бантыст сылгоймаджы æгъдау, æфсæрмдзаст æмæ хиуылхæцындзинад равдисын.
2016 азы Цæгат Ирыстоны уыд сабиты сфæлдыстадон конкурс «Диалог культур”. Дзабиты Георги йæ конд ныв «Чындзæхсæв»-ы фæрцы ацы конкурсы номинаци «Графикæ»-йы ссис 1-аг къæпхæны дипломы хицау.
Ивгъуыд аз Георгийы конд ныв «Беркъа» бавдыстой Цхинвалы Сывæллæтты сфæлдыстады галуаны национ темæйыл нывты конкурсмæ. Æмæ та уым дæр бацахста фыццаг бынат. Уыцы аз ма Дзæуджыхъæуы цыд сабиты аивадон куыстыты конкурс «Ныв кæнынц Ирыстоны сабитæ». Конкурсы темæ уыд «Театр». Архайдтой дзы Цæгат æмæ Хуссар Ирыстоны, Мæскуы æмæ Бетъырбухы аивадон скъолаты ахуыргæнинæгтæ. Георгийы конд ныв «Скоморохи» уыцы конкурсы номинаци «Нываивад»-ы бацахста фыццаг бынат.
Ныридæгæн тынг бирæ сты Георгийы хорзæхтæ йæ аивадон æнтыстыты фæдыл. Уыдон ын лæвæрд æрцыдысты алыхуызон конкурсты, куыд Хуссар Ирыстоны, афтæ Уæрæсейы дæр. Æрыгон нывгæнæг йæ алы куысты дæр сæйраг æргом здахы ирон национ æгъдæуттæ, рагфыдæлты царды уавæртæ, бæрæгбæттæ равдисынмæ. Уый бæрæг кæны, йæ миддунейы йын йæ Райгуырæн бæстæмæ уарзондзинад кæй ис.
Георги райгонд у йæ ахуыргæнджытæ Дзæгъиаты Альбинæ æмæ Кæсойты Лаврентæй: «Уыдоны руаджы æз ахуыр кæнын нывкæнынады аивады сусæгдзинæдтæ. Дæн сæ стыр бузныг ахæм аудгæ ахасты тыххæй», — зæгъы уый.
Курдиатджын лæппу цымыдис кæны фæсарæйнаг нывгæнджыты куыстытæм дæр. Зæгъæм, зонгæ у Ван Гогы æмæ Поль Гогены сфæлдыстадимæ. Йæхи куысты ары Ван Гогы куыстытимæ æнгæсдзинад. Зæгъæм, æрвгъуыз æмæ бур хуызтæй арæх кæй пайда кæны, уый.
Аивадæй дарддæр Георги архайы спорты дæр. У Бекъойты Булаты æрыгæтты футболон командæ «Спартак — Цхинвал»-ы хъазæг, æмæ йын уым дæр ис æнтыстытæ. Ныридæгæн фидарæй зоны, йæ фидæны дæсныйадæн кæй равзардзæн архитектурон факультет, æмæ йæ зæрды ис йæ Райгуырæн бæстæйæн ацы къабазы лæггад кæнын.
ХУЫГАТЫ Миленæ, Цхинвал
