Ацы бонты Цӕгат Ирыстоны кусӕг балцы ис Уӕрӕсейы Федерацийы Центрон ӕвзарӕн къамисы уӕнг Николай Левичев. Республикӕйы уазӕгимӕ фембӕлд Цӕгат Ирыстоны Сӕргълӕууӕг Битарты Вячеслав.
Ныхасы архайджытӕ ӕрдзырдтой Хъӕлӕс кӕныны иумӕйаг бон — 8 сентябры ӕвзӕрстытӕм цӕттӕ кӕныны фарстытыл.
Николай Левичев йӕ раныхасы куыд фӕнысан кодта, афтӕмӕй, Хъӕлӕс кӕныны иумӕйаг бонмӕ цӕттӕдзинады мадзӕлттыл кусгӕйӕ, сӕйрагдӕр у, цӕмӕй ӕвзӕрстытӕ арӕзт ӕрцӕуой закъоны бындурыл. «Уыимӕ, мӕ зӕрдӕ дарын, ӕвзарӕн системӕйы ӕппӕт хӕйтты ӕнӕкъуыхцы архайдыл, участокты ӕмӕ территорион къамисты уӕнгты фӕлтӕрддзинадыл. Ныфс мӕ ис, республикӕйы цӕрджытӕн сӕрибарӕй схъӕлӕс кӕнын ӕмӕ сӕ хъуыды зӕгъынӕн ӕппӕт фадӕттӕ дӕр арӕзт кӕй ӕрцӕудзӕн, уымӕй», — загъта Центрон ӕвзарӕн къамисы уӕнг.
Цӕгат Ирыстоны Сӕргълӕууӕг бӕстон радзырдта, Хъӕлӕс кӕныны бонмӕ республикӕйы цы организацион мадзӕлттӕ арӕзт цӕуы, уый тыххӕй. «Ӕвзӕрстытӕм цӕттӕ кӕныны ӕппӕт куыстытӕ дӕр афойнадыл конд цӕуынц», — бафиппайдта Битарты Вячеслав.
Фембӕлды архайдта РЦИ-Аланийы Центрон ӕвзарӕн къамисы сӕрдар Моргуаты Жаннӕ дӕр.
РЦИ-Аланийы Сӕргълӕууӕджы
ӕмӕ Хицауады пресс-службӕ
