Хетӕгкаты Къостайы уацмыстӕ чи иртасы, уыцы ахуыргӕндтӕ куыд сбӕрӕг кодтой, афтӕмӕй йе сфӕлдыстад ӕмӕ украинаг поэт Тарас Шевченкойы сфӕлдыстады ӕхсӕн ис идейон бастдзинад. Уымӕй уӕлдай ма сӕ хъысмӕтты дӕр бирӕ ис, чи сӕ иу кӕны, ахӕм цаутӕ. Дыууӕйӕ дӕр хъомыл кодтой сидзӕртӕй, тырныдтой ныв кӕнынмӕ, поэзимӕ, ахуыр кодтой Бетъырбухы Аивӕдты академийы.
Хетӕгкаты Къоста ӕмӕ Тарас Шевченкойы сфӕлдыстадмӕ куы ‘ркӕсӕм, уӕд дзы ссардзыстӕм бирӕ ӕмхуызондзинӕдтӕ, ӕнгӕс темӕтӕ. Сӕ уацмысты архайджытӕ уыдысты хуымӕтӕг адӕмы минӕвӕрттӕ.
Тарас Шевченко ӕмӕ Къоста уыдысты поэттӕ-интернационалисттӕ, национализмы знӕгтӕ. Куыд революционер-демократтӕ, афтӕ хорз ӕмбӕрстой, сӕ райгуырӕн бӕстӕтӕн социалон ӕмӕ национ цагъардзинадӕй фервӕзӕн кӕй ис ӕфсымӕрон адӕмтӕ кӕрӕдзимӕ ӕрбаиу уӕвыны руаджы. Ацы темӕйыл фыст ӕмдзӕвгӕты бирӕ ис иугӕнӕг хъуыдытӕ: Тарас Шевченкомӕ — «И мертвым, и живым»; Къостамӕ — «Друзьям, приятелям и всем, кто надоедает мне слезоточивыми советами».
Гуманисттӕ Т. Шевченко ӕмӕ Къоста сидтысты сылгоймаджы бартӕ бахъахъхъӕнынмӕ. Шевченкойы къорд уацмысы фыст ӕрцыдысты хъазайраг Уӕрӕсейы сылгоймаджы уӕззау хъысмӕтыл. Се ‘хсӕн — йӕ зындгонд поэмӕ «Катеринӕ». Хӕххон сылгоймаджы хъысмӕт тыхсын кодта Къостайы дӕр ӕмӕ ныффыста «Сидзӕргӕс», «На смерть горянки», «В бурю», поэмӕ «Фатимӕ» ӕмӕ ӕндӕртӕ.
Дыууӕ поэты ӕмдзӕвгӕты сӕйраг ӕмбырдгӕндты нӕмтты дӕр ис ӕмхуызондзинӕдтӕ. Шевченко йӕ фыццаг чиныг рахуыдта йӕ уарзон адӕмон инструмент кобзы номӕй — «Кобзарь». Къоста дӕр йӕ фыццаг чиныг рахуыдта адӕмон музыкалон инструменты номӕй — «Ирон фӕндыр».
Ацы нӕмттӕ ууыл дзурӕг сты, ӕмӕ чиныгкӕсӕгӕн ӕмбарын кӕнынц, ӕмбырдгӕндты ныхас кӕй цӕудзӕн адӕмы цардыл, сӕ бӕллицтӕ ӕмӕ сагъӕстыл, зарджытӕ ӕмӕ таурӕгътыл. Сӕ уацмысты ирдӕй зынынц адӕмон сфӕлдыстады мотивтӕ. Сӕ уидӕгтӕ та хӕццӕ кӕнынц адӕмон поэзийы гуырӕнтӕм. Иу ныхасӕй, адӕмон сфӕлдыстад поэттӕн ӕххуыс кодта сӕ адӕмты ивгъуыд историон рӕстӕг, сӕ тырнындзинӕдтӕ ӕмӕ хъуыдытӕ арфдӕр бамбарынӕн.
Уымӕй уӕлдай ма адӕмон сфӕлдыстадмӕ дыууӕ поэты дӕр кастысты куыд поэтикон хӕзнадонмӕ, афтӕ, хъӕздыг сын кодта сӕ аивадон дӕсныйад. Сӕ бон бацис сӕ зӕрдӕты аивады алы хуызтӕ баиу кӕнын — нывкӕнынад, поэзи, драматурги, стӕй журналистикӕ ӕмӕ ӕхсӕнадон куыст.
Къоста фыццагдӕр украинаг литературӕимӕ базонгӕ, Стъараполы гимназы ахуыр кӕнгӕйӕ. Ам уӕд куыстой дӕсны ахуыргӕнджытӕ. Фидӕны поэты дунембарынады рӕзтӕн стыр ӕххуыс фӕци Стъараполы губернийы ахуыргӕнӕндӕтты хицау Неверов, ахуыргӕнджытӕ Смирнов, Грушевский, стӕй Николай Гулак — Тарас Шевченкойы ӕмбал ӕмӕ ӕмкусӕг.
Гимназы библиотекӕйы Къостайӕн гӕнӕн уыдис уырыссаг литературӕйы ӕмӕ дунейы ӕндӕр фысджыты уацмыстӕ бакӕсынӕн. Тарас Шевченкойы сфӕлдыстадимӕ дарддӕр зонгӕ кодта Бетъырбухы Аивӕдты академийы ахуыры рӕстӕг. Уым ӕввахсдӕр базонгӕ фидӕны украинаг нывгӕнджытӕ Пимоненко ӕмӕ Самокишимӕ.
Бетъырбухы Къостайӕ рауад ӕхсӕнадон архайӕг, дзырды ӕмӕ нывкӕнынады дӕсны. Хъыгагӕн, материалон зындзинӕдты аххосӕй йӕ бон нӕ бацис академи фӕуын. ӕрыздӕхт Цӕгат Кавказмӕ ӕмӕ кӕцыдӕр рӕстӕг йӕ фыдмӕ ацард Кубаны. Уым бахӕлар Вячеслав Кухаренкоимӕ. Кӕд уый Къостайӕ хистӕр уыд, уӕддӕр сын нӕ бахъыгдардта сӕ хӕлардзинад. Кухаренкойы фыд Яков уыдис прогрессивон фыссӕг ӕмӕ Тарас Шевченкойы хорз хӕлар. Яков стыр ӕвӕрӕн бахаста Тарас Шевченкойы сфӕлдыстад парахат кӕныны хъуыддагмӕ.
Кубаны Къоста Кухаренкоты бинонтимӕ сӕвӕрдта спектакль. Уый тыххӕй газет «Северный Кавказ» 1886 азы фыста: «Хуыцаубоны, 1 апрелы, аивадуарзджытӕ концерт радтой мӕгуырты пайдайӕн, ӕмӕ дзы уыдис удӕгас нывтӕ. Куыд фехъуыстам, афтӕмӕй спектаклы хъӕппӕрис рацыд Кухаренкоты дыууӕ къайӕ. Уыдон нывгӕнӕг Хетӕгкаты Къостаимӕ хорз бакуыстой нывты композици ӕмӕ костюмтыл».
Украинӕйы, Херсоны ӕмӕ Очаковы Къоста ныффыста ӕмбисонды лирикон ӕмдзӕвгӕтӕ, уыимӕ поэмӕ «Плачущая скала», фыссын райдыдта поэмӕ «Хетӕг», фӕлӕ йын кӕронмӕ ахӕццӕ кӕнын нӕ бантыст.
Очаковы Къостайӕн цӕргӕ ӕрцыд кӕсагахсӕг Иосип Даниловы хӕдзары. Уымӕн уыд фарастаздзыд фырт Федор. 1959 азы Очаковы куы бӕрӕг кодтой Ирыстоны стыр поэты райгуырды 100 азы, уӕд бынӕттон газет «Коллективист Очаковщины»-йы мыхуыргонд ӕрцыдысты Иосип Даниловы фырт Федоры мысинӕгтӕ Къостайы тыххӕй: «Мӕ фыд Иосип уыдис мӕгуыр очаковаг кӕсагахсӕг. ӕз фыццаг бонтӕй фӕстӕмӕ тынг бауарзтон Къостайы ӕмӕ дзы мӕхи атонын мӕ бон нӕ уыд. Мӕныл уӕд цыдис фараст азы. Постмӕ цыдтӕн йӕ газеттӕ ӕмӕ фыстӕджытӕм. Иумӕ цыдыстӕм къардиумӕ, ардыгӕй цалдӕр километры дарддӕрӕй денджыз дзӕбӕх зынди.
— Кӕс-ма денджызы сӕрмӕ ауыгъд мигътӕм, — дзырдта мын уый, — уыдон мын мӕ зӕрдыл лӕууын кӕнынц Ирыстон, ӕз уым райгуырдтӕн. Уым дӕр амы хуызӕн адӕм ӕмӕ сывӕллӕттӕ ис, ӕмӕ сымах хуызӕн уыдон дӕр мӕгуырӕй мӕлынц. Куы байрӕзай, уӕд нӕм уазӕгуаты рацӕут, ӕмӕ хорз фӕзардзыстӕм.
«Дядя» Къоста уыд мӕ фыццаг ахуыргӕнӕг. Уый не ‘ппӕты дӕр ахуыр кодта кӕсын ӕмӕ фыссыныл. Кърандӕстӕ ӕмӕ нын тетрӕдтӕ балхӕдта.
— Ды, Федя, ахуыр кӕн фыссын ӕмӕ кӕсыныл, писмо мӕм ныффысдзынӕ! — дзырдта уый.
Мӕ зӕрдыл ма лӕууы, изӕрыгӕтты-иу кӕсагахсджытӕ мӕ фыдмӕ куыд цыдысты, уый. Къоста ӕдзухдӕр ныхас кодта семӕ. Хъуыды ма кӕнын, 1905 азы революци куы ралӕууыд, уӕд мын мӕ фыд дзырдта:
— Федор, паддзах куы нал уа, уӕд ӕппӕт адӕм дӕр ссӕрибар уыдзысты. Уый тыххӕй дзырдта Къоста дӕр.
Ацы мысинӕгтӕ дзурӕг сты Къостайы зӕрдӕхӕлар удыхъӕдыл. Цы сӕрибары дугмӕ бӕллыд, уый куы ралӕууыд, уӕд Украинӕйы поэттӕ М. Рыльский, В. Сосюра, М. Шеремет, И. Клименко ӕмӕ ӕндӕртӕ украинаг ӕвзагмӕ ратӕлмац кодтой Къостайы уацмыстӕ.
Хетӕгкаты Къостайы сфӕлдыстад ахуыр ӕмӕ парахат кӕнынмӕ стыр ӕвӕрӕн бахаста поэт, академик Павел Тычина. Уый 1950 азы уыдис «Ирон фӕндыр»-ы фыццаг рауагъды редактор ӕмӕ саразӕг украинаг ӕвзагыл. ӕрхӕссын ма мӕ фӕнды Павел Тычинайы ныхӕстӕ йӕ уац «Хетӕгкаты Къоста»-йӕ: «Хетӕгкаты Къоста цы рӕстӕджы цард ӕмӕ фыста, уыцы гуылфӕнтӕ раджы банцадысты, поэты зӕрдӕйы сагъӕстӕ та бонӕй-бонмӕ мах хуыздӕр ӕмбарӕм. Уымӕн ӕмӕ поэт махӕй нӕ алкӕмӕ дӕр у ӕввахс, нӕхион кӕй у, уый тыххӕй».
Лаурӕ Касимова,
Алагиры библиотекӕйы кусӕг
