Бынӕттон хиуынаффӕйады ӕвзӕрстытӕм стӕм цӕттӕ
Цӕгат Ирыстон-Аланийы ӕвзарӕн къамистӕ цӕттӕ сты 2019 азы 8 сентябры хъӕлӕс кӕныны иумӕйаг бонмӕ, бынӕттон хиуынаффӕйады оргӕнты ӕвзӕрстытӕм.
Республикӕ Цӕгат Ирыстон-Аланийы Центрон ӕвзарӕн къамис ацы ахсджиаг ӕвзӕрстытӕм цӕттӕгӕнгӕйӕ йӕ куыст арӕзта федералон ӕмӕ республикон закъонтӕ ӕмӕ территорион ӕвзарӕн къамисты пълантӕм гӕсгӕ Республикӕ Цӕгат Ирыстон Аланийы бынӕттон хиуынаффӕйады оргӕнты ӕвзӕрстыты домӕнтӕ нӕ халгӕйӕ.
Дигорайы, Ӕрӕфы, Мӕздӕджы районтӕ ӕмӕ Дзӕуджыхъӕуы Галиуфарсы (ацы аз уый дзуапп дӕтты Дзӕуджыхъӕуы ӕвзӕрстытӕн) территорион ӕвзарӕн къамистӕн арӕзт ӕрцыд ӕппӕт мадзӕлттӕ дӕр ӕвзӕрстытӕм, куыд ӕмбӕлы, афтӕ бацӕттӕ кӕныны тыххӕй.
Ӕвзӕрстыты архайдзӕн 145 иудадзыг ӕвзарӕн участочы, 14 та, адӕм рӕстӕгмӕ кӕм вӕййынц, уыцы бынӕтты.
Хъӕлӕс кӕныны бӕрӕггӕнӕнтӕ ӕмӕ кӕронбӕттӕны суагъӕтӕ тагъддӕр ӕмӕ хуыздӕр банымайыны тыххӕй, стӕй адӕмы ӕууӕнк ӕвзӕрстытӕм фӕфидардӕр кӕныны тыххӕй 59 ӕвзарӕн участочы ӕвӕрд ӕрцыд ӕвзарӕн бюллетентӕ бабӕстонгӕнӕн комплекстӕ, иннӕ участокты дӕр хъӕлӕстӕ нымайгӕйӕ пайда кӕндзысты ӕвзӕрстыты ногдӕр технологитӕй. Ӕппӕт участоктӕ дӕр ивтонггонд ӕрцыдысты информацион стендтӕ, хъӕлӕс кӕныны кабинӕтӕ, бюллетентӕ кӕдӕм ӕппардзысты, ахӕм бынӕттон ӕмӕ хӕсгӕ асыччытӕй.
Цӕмӕй иумӕйаг хъӕлӕс кӕныны бон ӕхсӕнадон ӕгъдау хӕлд ма цӕуа, цӕмӕй ӕвзӕрстытӕ нывыл ацӕуынӕн цӕлхдуртӕ ӕвӕрд ма цӕуа, уый тыххӕй ӕвзарӕн къамистӕн ӕххуысӕн арӕзт ӕрцыд кусӕг къордтӕ.
2019 азы 14 майы, 14 июны, 30 июлы ӕмӕ 28 августы уыцы кусӕг къордтӕн сарӕзтам ӕмбырдтӕ. Уыдоны бӕстон ныхас цыд ӕвзарӕн къамистӕн хуыздӕр баххуыс кӕныны мадзӕлттӕ, ӕдасдзинады, нывыл кусыны уавӕртӕ сын саразыны фӕдыл. Республикӕ Цӕгат Ирыстон-Аланийы Центрон ӕвзарӕн къамисы 2019 азы 25 апрелы уынаффӕйӕ фидаргонд ӕрцыд видеоцӕстдарды фӕрӕзтӕй пайда кӕныны фӕтк. Уымӕ гӕсгӕ Дзӕуджыхъӕуы, Дыгуры, ӕрӕфы ӕмӕ Мӕздӕджы районты ӕвзарӕн къамисты акционерон ӕхсӕнад «Ростелеком» сӕвӕрдта видеоцӕстдарды ӕмӕ Интернеты ӕвдисӕн системӕтӕ, 82 ӕвзарӕн участочы ӕвӕрд ӕрцыд видеофиксацийы системӕтӕ, 63 ӕвзарӕн участочы ифтонггонд ӕрцыдысты видеорегистратортӕй.
РЦИ-Аланийы мидхъуыддӕгты оргӕнтимӕ арӕзт ӕрцыдысты ӕдасдзинады мадзӕлттӕ, ӕвзӕрстытӕ кӕм цӕудзысты уыцы агъуыстыты ӕмӕ сӕ алфамбылай дӕр.
Ӕвзарӕн къамистӕ ифтонггонд ӕрцыдысты къухы хӕсгӕ 170 ӕмӕ 57 стационарон металлодетектортӕй. Уӕрӕсейы миграцион службӕйы РЦИ-Аланийы территорион оргӕнтӕ сбӕлвырд кодтой ӕвзарджыты номхыгъдтӕ.
Ӕвзарӕн участоктӕн сӕ 90 проценты сты фыццӕгӕм уӕладзгуыты, ис дзы сӕрмагонд кабинӕтӕ, цӕстӕй хорз чи нӕ уыны, уыдонӕн ӕмӕ ӕндӕр сахъат адӕймӕгты уавӕртӕ фӕрогдӕр кӕнынӕн.
Участокты ӕвзарӕн къамисты уӕнгтимӕ арӕзт ӕрцыд семинартӕ, алчидӕр дзы зоны йӕ бартӕ ӕмӕ йӕ хӕстӕ.
Сӕрмагонд ахуыртӕ сарӕзтам ӕвзарӕн къамисты сӕрдартӕ ӕмӕ участокты архайӕг оператортӕн. 28 августы Дыгуры, Ӕрӕфы, Мӕздӕджы районты ӕмӕ Дзӕуджыхъӕуы территорион ӕвзарӕн къамисты хъӕлӕс кӕнын райдыдтой ӕмгъуыдӕй раздӕр.
Уыцы районты участокты ӕвзарӕн къамисты та ӕмгъуыдӕй раздӕр хъӕлӕс кӕнын райдыдтой 4 сентябры.
Цыбыр дзырдӕй, республикӕйы центрон къамис, бынӕттон хиуынаффӕйады ӕвзӕрстыты федералон ӕмӕ республикон закъонты домӕнтӕ ӕххӕстгӕнгӕйӕ, сарӕзта ӕппӕт мадзӕлттӕ дӕр ӕвзӕрстытӕм бӕстон бацӕттӕ кӕнынӕн.
Хъуыдаккаты Сослан,
РЦИ-Аланийы Центрон ӕвзарӕн къамисы сӕрдары хӕдивӕг
