Дзӕуджыхъӕуы Уалдзыгон уынджы знон кадджын уавӕры байгом, нырыккон домӕнтӕн дзуапп чи дӕтты, ахӕм ног скъола-гимназ «Интеллект». Йе скъоладзаутӕй фӕстӕмӕ дзы ахуыр кӕндзысты, хӕстӕг районы цы сабитӕ цӕры, уыдон дӕр. Ӕдӕппӕтӕй уыдзысты 700-йы. Нырма уал сты 1-ӕй — 6-ӕм къласы онг, фӕлӕ дзы дарддӕр уыдзӕн фараст къласы.
Бӕрӕгбоны архайдтой Цӕгат Ирыстон-Аланийы Сӕргълӕууӕг Битарты Вячеслав, РЦИ-Аланийы Хицауады Сӕрдар Тускъаты Таймураз, Хицауады Сӕрдары хӕдивджытӕ Икъаты Русланбег ӕмӕ Иринӕ Азимова, РЦИ-Аланийы ахуырад ӕмӕ наукӕйы министр Людмилӕ Башарина, РЦИ-Аланийы арӕзтад ӕмӕ архитектурӕйы министр Касаты Таймураз, Дзӕуджыхъӕуы администрацийы сӕргълӕууӕг Ӕлбегаты Барис, арӕзтадон организаци «Гарант-пром-бизнес»-ы разамонӕг Зӕнджиаты Сослан.
Скъоладзаутӕн ӕмӕ сӕ ныййарджытӕн арфӕ ракодта нӕ республикӕйы Сӕргълӕууӕг Битарты Вячеслав.
— Нӕ зынаргъ ахуырдзаутӕ, ныййарджытӕ ӕмӕ ахуыргӕнджытӕ! Арфӕ уын кӕнын абон ахӕм рӕсугъд бӕрӕгбоны фӕдыл! Ацы ног скъола арӕзт ӕрцыд нырыккон ног домӕнтӕм гӕсгӕ. Ам нӕ сабиты иттӕг хорз ахуырӕн арӕзт ӕрцыдысты ӕппӕт фадӕттӕ дӕр. Хъыгагӕн, нырма нӕ республикӕйы фаг скъолатӕ ӕмӕ рӕвдауӕндӕттӕ нӕй, фӕлӕ нӕ республикӕйы Хицауад араздзӕн ӕппӕт мадзӕлттӕ дӕр, цӕмӕй уыцы фарст лыггонд ӕрцӕуа хӕстӕгдӕр рӕстӕгмӕ. Ног микрорайонты аразӕм ног скъолатӕ, рӕвдауӕндӕттӕ, зӕронд скъолатӕ та бындуронӕй цалцӕггонд цӕудзысты, — загъта Битарты Вячеслав. Ӕмӕ ма бафиппайдта: — Ног скъола саразын диссаг нӕу. Ацы хъомыладон артдзӕсты цы ахуыргӕнджытӕ кусдзӕн, уыдон хъуамӕ сӕ куыстмӕ бӕрнон цӕстӕй кӕсой, уымӕн ӕмӕ сӕ ахастӕй аразгӕ у нӕ райсомы фидӕн, ацы скъолайы нӕ бӕстӕйӕн цавӕр адӕймӕгтӕ бахъомыл уыдзӕн, уый! Уымӕ гӕсгӕ сӕйрагдӕр у, цы зонындзинӕдтӕ райсдзысты, уыимӕ ма хъомыладон фарст дӕр.
Сывӕллӕттӕн ӕмӕ уазджытӕн арфӕ ракодта ахуырадон центр «Интеллект»-ы директор, УФ-йы ӕмӕ РЦИ-Аланийы ахуырады сгуыхт кусӕг, конкурс «Хуыздӕр директор 2008» уӕлахиздзау Гӕлӕуты Беллӕ:
— Нӕ зынаргъ уазджытӕ, арфӕ уын кӕнӕм! Абон ацы скъоламӕ цы сабитӕ ӕмӕ ныййарджытӕ ӕрӕмбырд, уыдон ӕмӕ ахуыргӕнджыты номӕй «бузныг» зӕгъӕм, ахӕм диссаджы скъола нын чи сарӕзта, уыдонӕн! Йӕ бакастӕй дӕр ӕмӕ йӕ ифтонгадӕй дӕр ацы скъола у нырыккон. Сывӕллӕттӕн мӕ зӕрдӕ зӕгъы, ахуыры стыр ӕнтыстдзинӕдтӕм куыд тырной, уый.
700 ахуырдзауы бакъахдзӕф кодтой райдзаст кълӕстӕм. Алы кабинеты дӕр ис интерактивон фӕйнӕг, йӕ фарсмӕ та — фӕлладуадзӕн агъуыст. Сывӕллӕттӕн арӕзт ӕрцыдысты ӕппӕт уавӕртӕ дӕр ахуыр кӕнынӕн ӕмӕ сӕ фӕллад уадзынӕн. Хими ӕмӕ математикӕйӕ зӕрдӕргъӕвд сабитӕн дзы сарӕзтой хъазӕн наукон лабораторитӕ. Алы уӕладзыджы дӕр къулыл ауыгъд сты электронон географион картӕтӕ, цӕмӕй сывӕллӕттӕ хуыздӕр зоной нӕ республикӕйы горӕттӕ ӕмӕ хъӕутӕ, Уӕрӕсейы ӕмӕ иннӕ бӕстӕты горӕттӕ.
Рохуаты нӕ баззадысты, йе ‘нӕниздзинад хъыгдард кӕмӕн у, уыцы сывӕллӕттӕ дӕр. Уыдонӕн скъолайы сарӕзтой пандустӕ, лифт ӕмӕ ӕндӕр фӕрӕзтӕ.
Скъоладзаутӕ ацы скъолайы уыдзысты ӕнӕхъӕн бон, уымӕ гӕсгӕ ӕргом здӕхт ӕрцыд, фӕсурокты сӕ рӕстӕг куыд ӕрвитдзысты, уымӕ дӕр. Лӕппутӕн сӕ бон уыдзӕн ӕфсӕйнаг ӕмӕ хъӕдӕрмӕгимӕ кусын. Уый тыххӕй дзы ис сӕрмагонд кабинеттӕ тӕрхытӕ зырнӕйзилӕн кусӕнгӕрзтимӕ. Чызджытӕн та — костюмтӕ хуыйӕн ӕмӕ репетицион залтӕ.
Ахуыр кӕнынӕн, ӕнӕмӕнг, цы техникӕ хъӕуы, уыдонӕй алцӕмӕй дӕр ифтонггонд сты фаг. Скъолайы кӕрт у рӕсугъд аивгонд, ис дзы спортивон фӕзтӕ, бандӕттӕ. Зӕрдӕ дзы райы.
Хъойбайты Галинӕ
Къамтӕ систа Къӕбысты Харитон
