Ацы бонты республикон театр «Саби»-йы артисттӕ гастролон балцы сты Абхазы. Абхазаг сывӕллӕттӕ ирыстойнаг театры аивадимӕ зонгӕ кӕндзысты 20 сентябры онг.
Зындгонд куыд у, афтӕмӕй «Саби» фарон дӕр уыд Сухумы. Уыцы балц тынг зӕрдӕмӕдзӕугӕ рауад — республикӕйы адӕм равдыстой стыр цымыдисдзинад дзӕуджыхъӕуккаг артистты архайдмӕ.
Ӕмӕ сӕ абхазӕгтӕ куыд хорз суазӕг кодтой, уый зӕрдыл даргӕйӕ, ацы аз «Саби»-йы коллектив ӕфсымӕрон республикӕмӕ сфӕлдыстадон балцмӕ бацӕттӕ кодта абхазаг фыссӕг Константин Ломиайы поэмӕмӕ гӕсгӕ ӕвӕрд спектакл «Хуры чызг» (йӕ режиссер-ӕвӕрӕг у Багъраты Иринӕ).
Уымӕй уӕлдай, абхазаг аивадуарзджытӕ бакӕсдзысты Гӕлӕуты Аслӕнбеджы ӕвӕрд спектакл «Нарт ӕмӕ сыгъзӕрин фӕткъуы» ӕмӕ Эрмик Бабаянцы ӕвӕрд спектакл «Алӕмӕты зӕрватыкк»-мӕ.
