Боксӕй хӕцӕг ацы чызг рингмӕ куы рахизы, уӕд ӕй, къӕдзӕхау, нӕ сӕнкъуысын кӕндзынӕ. Царды та у, зӕрдӕ рӕсугъд ӕнкъарӕнтӕй чи байдзаг кӕны, ахӕм аив дидинӕг.
Германы боксӕй цы дунеон чемпионат цыдис WIBE ӕмӕ WBF хуызтӕй, уым уӕлахиздзау, чемпион ссис дзӕуджыхъӕуккаг саурӕсугъд чызг Дудиаты Фатимӕ. Йӕ ныхмӕлӕууӕг испайнаг Мари Кармэн Ромеройӕн ацы аив, зӕдӕнгӕс «тохгӕнӕг» иунӕг гӕнӕн дӕр нӕ ныууагъта амбулыны охыл.
Интернеты тыгъдады «В Контакте» Фатимӕ йе ‘ппӕт фарсхӕцджытӕн арфӕ кӕны, зӕгъы зӕрдӕбын бузныг: «Уе ‘ппӕты дӕр мӕ хъӕбысы кӕнын, раст уе стджыты къӕс-къӕс куыд ссӕуа, уый онг». Фатимӕ бирӕ азты архайы ӕмхӕццӕ хъӕбысхӕстӕй, у боксӕй спорты мастермӕ кандидат, боксӕй Уӕрӕсейы чемпионаты кӕронбӕттӕн фембӕлды уӕлахиздзау, MIMA-йӕ Уӕрӕсейы дыууӕ хатты чемпион, бразилийаг джиу-джитсуйӕ ӕрвхуыз роны хицау, грепплингӕй Уӕрӕсейы чемпионаты призер ӕмӕ панкратионӕй Уӕрӕсейы чемпион.
Ӕппӕт уыцы уӕлахизты тыххӕй Дудиаты чызгмӕ ӕрхатыдысты профессионалон боксы бадзырд бафыссынмӕ.
Чызг ӕмӕ тохгӕнӕг, хӕцӕг — уыдон куыд ис баиу кӕнӕн?! Ис, ӕвӕццӕгӕн! Бакӕсут ма ацы саурӕсугъдмӕ, йӕ цӕхӕркалгӕ цӕстытӕм, йе ‘сконд, йӕ фӕлгонцмӕ!
Евгения Сокорева
