Уӕрӕсейы Федерацийы Президенты ӕххӕстбарджын минӕвар Цӕгат Кавказы федералон зылды Александр Матовников Налцыччы скодта ӕххӕстбарджыны цур советы ӕмбырд. Архайдтой дзы Цӕгат Кавказы хъуыддӕгты тыххӕй министр Сергей Чеботарев, Уӕрӕсейы Генералон прокуроры хӕдивӕг Дмитрий Демешин, федералон ведомствӕты бӕрнон кусджытӕ, Цӕгат Кавказы республикӕты разамонджытӕ.
Ӕмбырды архайдтой РЦИ-Аланийы Сӕргълӕууӕг Битарты Вячеслав ӕмӕ федералон инспектор Челӕхсаты Владимир. Рӕгъмӕ рахастӕуыд, Цӕгат Кавказы федералон зылды рӕзты паддзахадон программӕтӕ царды ӕххӕстгонд куыд цӕуынц, уыимӕ баст фарстытӕ. Александр Матовников ӕмбырды архайджытӕн куыд бамбарын кодта, афтӕмӕй Цӕгат Кавказы рӕзты паддзахадон программӕтӕ сты регионы социалон-экономикон размӕцыды сӕйраг рахӕцӕнтӕ. Уыдоны фӕрцы адӕмы царды хӕрзхъӕддзинад ис фӕбӕрзонддӕр кӕнӕн.
Цӕгат Кавказы хъуыддӕгты тыххӕй министр Сергей Чеботарев куыд бафиппайдта, афтӕмӕй ацы паддзахадон программӕтӕ федералон министрадӕн сты регионы экономикӕ ӕмӕ социалон къабаз рӕвдздӕр размӕ рахоныны гӕнӕнтӕ. Йӕ хатдзӕгтӕм гӕсгӕ, 2017 азӕй райдайгӕйӕ, Цӕгат Кавказы субъектты социалон-экономикон рӕзты авд дӕлпрограммӕйы фӕлгӕты ӕххӕстгонд цӕуы 26 инвестицион проекты. Уыдоны фӕрцы уал байгом 613 кусӕн бынаты, регионы бавӕрдтой 2 миллиард сомы бӕрц.
Федералон зылды республикӕтӕ ацы аз туризм, промышленност ӕмӕ агропромышленнон комплексы рӕзтимӕ баст проекттӕ равзарыны тыххӕй балӕвӕрдтой 21 куырдиаты. Ӕдӕппӕтӕй сын бахъуыд 9 миллиарды ӕмӕ 697 милуан сомӕй фылдӕр, уыдонӕй федералон бюджет радих кодта 2 миллиарды ӕмӕ 242 милуан сомӕй фылдӕр. Фӕсаууонмӕ хъӕлӕс кӕныны хатдзӕгтӕм гӕсгӕ, ведомствӕты ‘хсӕн кусӕг къорд Цӕгат Ирыстоны инвестицион проекттӕй равзӕрста дыууӕ.
Министр куыд радзырдта, афтӕмӕй ацы аз куыст дарддӕр цыдис стырдӕр туристон комплекстӕ — «Архыз», «Ведучи», «Армхи» ӕмӕ «Мамысон»-ыл. «Ныридӕгӕн райстам хӕххон рекреацион комплекс «Мамысон»-ы инженерон хызты тыххӕй паддзахадон экспертизӕйы хатдзӕгтӕ. Куыддӕр ӕхца лӕвӕрд ӕрцӕуа, афтӕ куыстытӕ райдайдзысты, уый тыххӕй ӕрӕджы стыр ӕмбырды загъта Уӕрӕсейы Хицауады Сӕрдар Дмитрий Медведев. Комплексы мидӕг хъуамӕ цы объекттӕ фӕзына, уыдонӕн та 2020 азы, мартъимӕ, сцӕттӕ кӕндзысты сӕ проектон-хӕрдзты документаци. Ис ӕмбӕлгӕ бадзырдтӕ, куыстытӕ цӕмӕ гӕсгӕ конд цӕуынц, ахӕм суагъӕ. Ӕппӕт документаци куы срӕвдз уа, уӕд аразынмӕ бавналдзыстӕм», — фӕбӕрӕг кодта Сергей Чеботарев.
Министр ма куыд фехъусын кодта, афтӕмӕй 2019 азы ӕхца ногӕй байуӕрстой ӕмӕ уый фӕрцы социалон ахадындзинадимӕ хъуыддӕгтӕн фӕрӕзтӕ лӕвӕрд ӕрцыд. Зӕгъӕм, Горӕтгӕрон районы ӕрхонкӕйы станицӕйы рынчындон рацаразынӕн радих кодтой 121 милуаны ӕмӕ 600 мин сомы. Октябрыхъӕуы сывӕллӕтты спортивон дыккаг скъолайы спортивон зал рацаразынӕн та — 35 милуаны ӕмӕ 640 мин сомы бӕрц. Зындгогнд куыд у, афтӕмӕй ацы аз РЦИ-Аланийы Хицауад ӕмӕ Цӕгат Кавказы хъуыддӕгты тыххӕй министрад сфидар кодтой разыйы гӕххӕтт, федералон бюджетӕй 500 милуан сомы радих кӕныны тыххӕй. Уый охыл балӕвӕрдтой 4 инвестицион проекты тыххӕй куырдиӕттӕ.
«РЦИ-Аланийы 2016-2025 азтӕн социалон-экономикон рӕзты» дӕлпрограммӕйы фӕлгӕты хъуамӕ арӕзт ӕрцӕуа бетон ӕмӕ ӕфсӕнбетоны конструкцитӕ, ӕндӕр арӕзтадон ӕрмӕгуадзӕг куыстуат, хъӕууонхӕдзарадон ӕмӕ сӕрмагонд техникӕ ӕлхӕд ӕрцӕудзӕн машинӕты-технологон комплекс «Кироваг» сифтонг кӕнынӕн. Ӕрӕфы районы ӕхсӕр садзынӕн радих кодтой 200 гектары. Хъуамӕ Беслӕны, 1490 квадратон метры чи ахсдзӕн, ахӕм ӕфснайӕн комплекс «Логопарк Green» аразын райдайой, балхӕндзысты уӕзӕгтӕласӕн стыр техникӕ, арӕзт ӕрцӕудзысты ӕфсӕнвӕндӕгтӕ ӕмӕ хъӕугӕ инфраструктурӕ.
РЦИ-Аланийы Сӕргълӕууӕджы
ӕмӕ Хицауады пресс-службӕ
