Ацы бонты УФ-йы Паддзахадон Думӕйы депутат Цӕгат Ирыстонӕй Мӕхъиты Зураб «регионалон къуырийы» фӕлгӕты бабӕрӕг кодта Беслӕн ӕмӕ фембӕлд Рахизфарсы районы цӕрджытимӕ.
Мӕхъийы-фыртӕн бынӕттон цӕрджытимӕ цы фембӕлд уыд, уым архайдтой Рахизфарсы районы разамонджытӕ Фрайты Сослан ӕмӕ Беркъаты Константин, республикӕйы ӕрдзон фӕрӕзтӕ ӕмӕ экологийы министр Мамиаты Чермен, хъӕууон хӕдзарад ӕмӕ хойраджы министр Уазиты Хъазыбег, РЦИ-Аланийы Парламенты депутат Гуытъиаты Вячеслав ӕмӕ ӕндӕр бӕрнон адӕймӕгтӕ.
Паддзахадон Думӕйы депутатимӕ фембӕлдмӕ ӕрбацыд 50 адӕймагӕй фылдӕр. Уыимӕ, ӕрмӕст беслӕйнӕгтӕ нӕ, фӕлӕ республикӕйы иннӕ районты цӕрджытӕ дӕр.
Адӕм Мӕхъийы-фыртмӕ бахатыдысты алыхуызон куырдиӕттимӕ. Ныхасы рӕстӕг куыд рабӕрӕг, афтӕмӕй ӕххуысагур ӕрбацӕуӕг адӕмы фарстыты фылдӕр хай баст уыд цӕрӕнуӕттӕ ӕмӕ коммуналон лӕггӕдтимӕ. Зӕгъӕм, Беслӕны цӕрджыты иу къорд ӕххуыс ракуырдта кӕлӕддзаг хӕдзӕрттӕй ног цӕрӕнуӕттӕм раивыны хъуыддаджы. Цӕрджыты ныхасмӕ гӕсгӕ, ног цӕрӕнуӕттӕ райсыны республикон программӕмӕ сӕ номхыгъдтӕ хаст ӕрцыдысты 2013 азы, фӕлӕ ныронг фарст лыггонд нӕма ‘рцыд. Депутат зӕрдӕ бавӕрдта, ацы фарстыл республикӕйы Арӕзтад ӕмӕ архитектурӕйы министрады разамындимӕ кӕй ӕрныхас кӕндзӕн, уымӕй.
Царды уавӕртӕ фӕхуыздӕр кӕнынӕй уӕлдай фембӕлдмӕ ӕрбацӕуӕг адӕм депутаты ӕргом аздӕхтой хардзгонд газы фиддонтӕм, зӕххы хӕйттӕ дих кӕнынмӕ, стӕй ӕндӕр фарстытӕм. Мӕхъийы-фырт алкӕцы куырдиатмӕ дӕр лӕмбынӕг ӕркаст ӕмӕ куыд фӕнысан кодта, афтӕмӕй се ‘ппӕтмӕ дӕр цӕстдард уыдзӕн.
Тотойты Маринӕ
