Национ проект «Экологи»-йы руаджы Алагиры районы ӕхгӕнынц ӕппарӕццӕгты ӕфснайӕнтӕ. Хъуыддӕгтӕ куыд ӕнтысынц, уый кусӕг балцы рӕстӕг равзӕрста РЦИ-Аланийы Хицауады Сӕрдар Тускъаты Таймураз.
Уыналы ӕппарӕццӕгтӕ ӕфснайӕны куыстытӕ цӕуынц 19 гектарыл, Хицауады Сӕрдары ӕрбацыдмӕ дзы змӕлыд фараст экскаваторы, цыппар бульдозеры ӕмӕ ӕвддӕс уӕзласӕны. Куыстытӕ фӕдзӕхсӕг у ӕрдзон фӕрӕзтӕ ӕмӕ экологийы министрад. Министры хӕдивӕг Хъарданты Алыксандр куыд загъта, афтӕмӕй куыстытӕ ӕххӕстгӕнӕг организаци ӕппӕт технологон хъуыддӕгтыл дӕр ӕнтыстджынӕй ӕххӕссы.
Тускъаты Таймуразы ныхасмӕ гӕсгӕ, нысангонд мадзӕлттӕ афойнадыл конд кӕй цӕуынц, уый у ӕхсызгон. «Ныридӕгӕн уал бахус кодтой техникон мал, ныр ацы егъау фӕз, иу цъар иннӕйыл ӕвӕргӕйӕ, ӕхгӕд цӕуы. Цӕмӕй ӕрыдоны донмӕ тӕссаг буаргъӕдтӕ ма бахауой, уый тыххӕй фӕзы ӕппӕт арӕнтыл ис бетонӕй гӕрӕнтӕ», — загъта Хицауады Сӕрдар.
Куырттаты комы, ӕрзӕтыссӕн фабричы ӕппарӕццӕгтӕ кӕдӕм калдтой, уым дӕр ныридӕгӕн фӕз ӕхгӕнынц. Куыстытӕ ӕххӕстгӕнӕг организацийы хицау Къесаонты Вадим куыд радзырдта, афтӕмӕй пайда кӕнынц ӕлыг, саумӕр, битум, цемент ӕмӕ чъырызмӕстӕй. Хъомысджын техникӕйы фӕрцы, 13 гектары цы фӕз ахсы, уый лӕгъз кӕнынц.
Кусӕг балцы рӕстӕг ма Хицауады Сӕрдар бабӕрӕг кодта скъолаты арӕзтӕдтӕ Дзӕуджыхъӕуы. Тускъаты Таймураз бафӕдзӕхста арӕзатад ӕмӕ архитектурӕйы министр Касаты Таймуразӕн, цӕмӕй ӕртӕ скъолайы арӕзтадӕн дихгонд ӕхца афойнадыл куыстгонд ӕрцӕуой. Уый тыххӕй та хъуамӕ министрад проекттӕ аразджытимӕ ӕмӕ арӕзтадон организацитимӕ саразой пълан.
Дыгуры районы дӕр Хицауады Сӕрдар бабӕрӕг кодта физкультурон-дзӕбӕхгӕнӕн комплексы, рӕвдауӕндоны арӕзтӕдтӕ. Алагиры, ӕрӕфы, ӕрыдоны ӕмӕ Кировы районты дӕр Тускъаты Таймураз ӕркаст, рӕвдауӕндӕттӕн цы ног уӕлӕмхасӕн бӕстыхӕйттӕ аразынц, уыдонмӕ. «Дӕргъвӕтин рӕстӕг хъӕуты цӕрджытӕ цы тыхстдзинӕдтӕ ӕвзӕрстой, уыдӕттӕ иуварсгонд ӕрцӕудзысты ацы арӕзтӕдты фӕрцы. Объекттӕ бабӕрӕг кӕнгӕйӕ, ис фенӕн, аразджытӕ цас зӕрдиаг ӕмӕ бӕрнонӕй кусынц, бынӕттон ӕмӕ республикон хицаудзинадимӕ сӕ ахастдзинӕдтӕ куыд сты, уыдӕттӕ. Куыст кӕрӕдзи ӕмбаргӕйӕ кӕм цӕуы, уый уайтагъддӕр фӕбӕрӕг вӕййы арӕзтадон фӕзтыл», — загъта Хицауады Сӕрдар.
РЦИ-Аланийы Сӕргълӕууӕджы ӕмӕ Хицауады пресс-службӕ
