Цӕгат Ирыстоны цӕрджыты ӕнӕниздзинад хъахъхъӕнынады, ахуырад ӕмӕ ӕндӕр социалон фарстытӕ лыг кӕныны нысанимӕ республикӕйы ӕххӕстгонд цӕуынц ахсджиагдӕр национ проекттӕ, сӕ иу у «Демографи».
Уый фӕлгӕты а фӕстаг рӕстӕг бирӕ мадзӕлттӕ конд цӕуы, уыдонӕй иу уыд знон Инвалидтӕ ӕмӕ ацӕргӕ адӕймӕгты республикон хӕдзар-интернат «Узӕлд»-ы. Ацы ран республикӕйы районты адӕмӕн социалон лӕггадгӕнӕг комплексон центртӕй алкӕмӕн дӕр лӕвӕрд ӕрцыдысты ног хӕдтулгӕтӕ «Газель Next». Сӕ дӕгъӕлтӕ сын районты центрты разамонджытӕн радта республикӕйы Хицауады Сӕрдар Тускъаты Таймураз.
Кадджын мадзал гом кӕнгӕйӕ, республикӕйы фӕллой ӕмӕ социалон рӕзты министр Хуыбиаты Барис загъта:
— Национ проект «Демографи» сӕххӕст кӕныны нысанимӕ а фӕстаг рӕстӕг республикӕйы конд цӕуынц бирӕ хорз хъуыддӕгтӕ. Ӕнӕбафиппайгӕ сын нӕй. Национ проект ӕвдисы, адӕмы социалон фарстытӕ лыг кӕнынӕн паддзахадмӕ гӕнӕнтӕ ӕмӕ фӕрӕзтӕ кӕй ис ӕмӕ сыл уыдоны фӕрцы кӕй кусӕм, уый.
Министр арфӕ ракодта Тускъаты Таймуразӕн, уымӕн ӕмӕ национ проекттӕ республикӕйы ӕххӕст кӕныныл сӕрмагондӕй дзуапп дӕтты Хицауады Сӕрдар.
— Нӕ размӕ ис ахсджиаг нысан, — йӕ цӕрджытӕ 80 азӕй фылдӕр кӕмӕн цӕрынц, нӕ бӕстӕйы ахӕм регионты номхыгъдмӕ бахауын. Уыцы нысанимӕ ӕххӕст кӕнӕм национ проекттӕ «Демографи», «Хистӕр кары адӕм» ӕмӕ иннӕтӕ. Хистӕртӕн хъуамӕ уавӕртӕ аразӕм, цӕмӕй, гӕнӕн цас ис, уый бӕрц фылдӕр цӕрой, уой ӕнӕниз ӕмӕ куыстхъом. Ацӕргӕ адӕм сты уый аккаг. Афтӕ цӕмӕй уа ӕмӕ сӕм цӕмӕй медицинон лӕггӕдтӕ фӕхӕстӕгдӕр уой, уымӕ гӕсгӕ лӕвӕрд цӕуынц ацы хӕдтулгӕтӕ дӕр, — загъта Тускъаты Таймураз.
Афтӕмӕй Алагиры, ӕрыдоны, Дыгуры, ӕрӕфы, Мӕздӕджы, Кировы, Горӕтгӕрон ӕмӕ Рахизфарсы районты Адӕмӕн социалон лӕггадгӕнӕг комплексон центрты разамонджытӕ Хицауады Сӕрдары къухӕй райстой ног хӕдтулгӕты дӕгъӕлтӕ. Хӕдтулгӕты ис фадӕттӕ сӕрмагондӕй ацӕргӕ адӕмы ӕмӕ инвалидты ласынӕн. Суанг ма дзы ис уӕлӕмӕисӕн дӕр. Уый фӕрцы, зынтӕй чи цӕуы, ахӕм инвалидӕн дӕр йӕ бон уыдзӕн ӕнӕ искӕй ӕххуысӕй коляскӕ мидӕмӕ батӕрын.
Нырӕй фӕстӕмӕ хӕдтулгӕтӕ лӕггад кӕндзысты инвалидтӕн ӕмӕ, 65 азӕй уӕлӕмӕ кӕуыл цӕуы, ахӕм ацӕргӕ адӕмӕн ӕмӕ сӕ хъӕутӕй ӕмӕ районтӕй ласдзысты, се ‘нӕниздзинадмӕ гӕсгӕ сӕ цавӕр медицинон ӕххуыс бахъӕуа, уыцы рынчындӕттӕм, поликлиникӕтӕм.
ДЕДЕГКАТЫ Зӕлинӕ
Къамтӕ систа Къӕбысты Харитон
