Дзӕуджыхъӕуы Разамынды институты кадджын уавӕры, пенси исын афон кӕмӕн нӕма у, ахӕм адӕмӕн лӕвӕрд ӕрцыдысты дипломтӕ. Уыдон 3 мӕйы дӕргъы ахуыр кодтой ног дӕсныйад — «Оператор ЭВМ» райсыныл. Бирӕтӕн дзы сӕ иттӕг хорз ахуыры тыххӕй радтой сырх дипломтӕ.
Ацы хъуыддаг сырӕзыд Адӕмӕн куыст дӕттыны комитеты фӕрцы национ проект «Демографи» ӕмӕ программӕ «Хистӕр фӕлтӕр»-ы фӕлгӕты.
Кадджын мадзалы архайдта РЦИ-Аланийы Адӕмӕн куыст дӕттыны комитеты разамонӕг Платы Альбинӕ. Йӕ ныхасмӕ гӕсгӕ, УФ-йы Хицауад сӕрмагондӕй национ проект «Хистӕр фӕлтӕр»-ӕн радих кодта 17 милуан сомы. Уыцы хъуыддаг стыр ахъаз фӕци уӕлӕмхасӕн ахуырадӕн.
— Ахӕм къордтӕ арӕзт ӕрцыд нӕ республикӕйы алы районы дӕр. 500 адӕймаджы бӕрц республикӕйы 17 ахуыргӕнӕндоны райстой ног дӕсныйӕдтӕ. Уый у хорз хъуыддаг, уымӕн ӕмӕ нӕм ис, кӕй ахуыр кӕнӕм, цӕуыл ахуыр кӕнӕм, ӕмӕ нӕм ис фӕрӕзтӕ, цӕмӕй ӕппӕт уыцы пълантӕ нӕ къухы бафтой. Уымӕ гӕсгӕ бузныг стӕм Федералон хицауадӕй, ахӕм фадат нын кӕй радта, уый тыххӕй, — бафтыдта ма йӕ ныхасыл Платы Альбинӕ.
Институты информацион технологитӕ ӕмӕ гуманитарон дисциплинӕты кафедрӕйы сӕргълӕууӕг Бӕгъиаты Маринӕ ма у уӕлӕмхасӕн ахуырады программӕйы разамонӕг дӕр.
— Сӕрмагонд ахуырадон программӕйыл бакуыстой институты ахуыргӕнджытӕ сӕхӕдӕг. Йӕ методикӕ у алывӕрсыг. Кусгӕ чи кӕны ӕмӕ йӕ кусӕн бынатӕй фӕцух кӕнын йӕ бон кӕмӕн нӕу, уыдонӕн дзы ис дӕрддзӕфмӕ ахуырад. Ӕдӕппӕтӕй нӕм ахуыр кодтой 50 адӕймаджы нӕ республикӕйы авд районӕй, — загъта Бӕгъиаты Маринӕ.
Гуыриаты Ритӕ у, ног дӕсныйад чи райста, уыдонӕй иу. Алы бон дӕр Уӕллаг Зӕрӕмӕгӕй ӕнӕзивӕгӕй ахуыр кӕнынмӕ цыд Дзӕуджыхъӕумӕ.
— Ардӕм мӕ ахуыр кӕнынмӕ рарвыста Алагиры Адӕмӕн куыст дӕттыны комитет. Автобус Уӕллаг Зӕрӕгмӕ нӕ цӕуы, ӕмӕ кӕм таксийыл, кӕм исты амӕлттӕй, уӕддӕр ӕнӕцухтӕй цыдтӕн ахуырмӕ. Тынг ӕхсызгон мын у, абон мӕ диплом кӕй райстон, уый. Фӕсмон ницӕуыл кӕнын, нӕ ахуыргӕнджытӕй тынг разы дӕн. Афтӕ зӕрдиагӕй ӕмӕ цӕстуарзонӕй нын амыдтой алцыдӕр, раст сывӕллонӕн куыд амонай, афтӕ ӕнцон— ӕмбарӕн ӕвзагыл. Дарддӕр мӕ зӕрдӕ дардзынӕн куыст ссарыныл, — радзырдта ног дӕсныйад райсӕг Гуыриаты Ритӕ.
Хъойбайты Галинӕ
Къам систа Къӕбысты Харитон
