Япойнаг горӕт Осакайы октябры ӕртыккаг къуыри сумойӕ цы дунеон чемпионат цыди, уым Уӕрӕсейы иугонд командӕйы фӕлгӕты ерысты архайдтой цыппар ирон богалы.
Нӕ сумоисттӕ тох кодтой хицӕн спортсменты чемпионаты ӕмӕ командон ерысты. Куыд рахӕцыдысты, уый тыххӕй нӕ командӕйы хистӕр тренер Рӕмонты Эдуард радзырдта: «Иуӕй сыл бацингӕнӕн ис, иннӕмӕй та, хардзау кӕсы хицӕн спортсменты ерысы, ацы хатт ӕнӕ сыгъзӕрин хӕрзиуӕгӕй кӕй сыздӕхтысты, уый. Хицӕн спортсменты ерысы уӕззау уӕзы хӕцгӕйӕ, Багаты Руслан ӕрдӕгкӕронбӕттӕны кӕй фӕхӕрд, уый йӕ 3-аг бынатӕй уӕлдӕр нал суагъта. Куыдзойты Эдуард дӕр фӕкъуылымпы ӕрдӕгкӕронбӕттӕны ӕмӕ бацахста 3-аг бынат.
Сумойӕ командон ерыстӕн ис уӕлдай кад, ӕмӕ та ацы хатт дӕр Уӕрӕсейы командӕйӕн йӕ фылдӕр уыдысты нӕ богӕлттӕ. Растдӕр зӕгъгӕйӕ та, хӕцынмӕ чи рацыд, уыдон иууылдӕр нӕ лӕппутӕ уыдысты, ӕмӕ сын бантыст сӕ сӕйраг нысан сӕххӕст кӕнын. Командон ерысты фӕуӕлахиз сты Къарейы, Монголы ӕмӕ Китайы командӕтыл, ӕмӕ кӕронбӕттӕны фембӕлдысты Японы спортсментимӕ. Командон ерысты тохтӕ фӕцӕуынц иу уӕзы. Алы командӕйӕ дӕр фӕхӕцынц фӕйнӕ ӕртӕ богалы. Ам иумӕйаг уӕлахиз аразгӕ у командӕйы уӕнгтӕй алкӕмӕй дӕр, ӕмӕ уыцы хъуыддаджы нӕ лӕппутӕ сӕхи равдыстой тынг бӕрнонӕй. Алчидӕр сӕ тох кодта, йӕ хъарутыл нӕ ауӕрдгӕйӕ. Японы командӕимӕ хъазуатон тох ахицӕн уӕрӕсейӕгты пайдайӕн 2:1 хыгъдӕй. Нӕ командӕйӕн уӕлахиз ӕрхастой Хъазиты Ацӕмӕз ӕмӕ Хъараты Зауыр. Уыдон сӕ ныхмӕлӕуджытыл куы фӕуӕлахиз сты, уӕд хыгъд ссис 2:1 Уӕрӕсейы пайдайӕн ӕмӕ нӕ командӕ хорзӕхджын ссис чемпионаты сӕйраг лӕварӕй.
Сӕ тренер куыд зӕгъы, афтӕмӕй чемпионаты фӕстӕ нӕ сумоисттӕ дӕс боны дӕргъы баззадысты Японы, ӕмӕ зонгӕ кодтой, уымы тренертӕ сӕ хъомылгӕнинӕгтимӕ куыд кусынц, уыимӕ. Хъазиты Ацӕмӕзы ныхасмӕ гӕсгӕ, нӕхи тренертӕ дӕр дард нӕ лӕууынц япойнӕгтӕй. Токаты Владислав дӕр махимӕ кусгӕйӕ, пайда кодта, японы кӕй федтам, ахӕм, кӕнӕ та уыдонмӕ хӕстӕг мадзӕлттӕй. Ирыстоны сумоисттӕ сӕ ахуырты дарддӕр дӕр уыцы мадзӕлттӕй куы пайда кӕной, уӕд нӕ фӕрӕдийдзысты.
Рӕмонты Эдуард куыд зӕгъы, афтӕмӕй нӕ сумойы скъолайы ахуыртӕн ныртӕккӕ ӕмбӕлгӕ уавӕртӕ нӕй. Уыцы хъуыддаджы нӕм фӕкӕсӕг куы фӕуа, уӕд та нӕ лӕппуты стыр уӕлахизты кой райхъуысдзӕн.
Баскаты Уырызмӕг
