Ханты-Мансийскы горӕт Нефтеюганскы уӕгъдибар хъӕбысхӕстӕй 25-27 октябры цыдысты Уӕрӕсейы спортивон хъӕбысхӕстыты федерацийы вице-президент Владимир Семеновы номыл дунеон турниры ерыстӕ.
Турниры алы бӕстӕтӕй цы зындгонд богӕлттӕ хӕцыди, уыдонимӕ ерыс кодтой ирыстойнаг богӕлттӕ дӕр, ӕмӕ сын бантыст дӕс хӕрзиуӕджы рамбулын.
Нӕ богӕлттӕй ӕппӕты ӕнтыстджындӕр разынд Хуыбецты Кахабер. 79 кг онг уӕзы хӕцгӕйӕ, Кахабер иу хатт дӕр къуыхцы не ‘руагъта ӕмӕ ссис турниры уӕлахиздзау. Йӕ уӕзы сӕрӕн хӕст кодта нӕ иннӕ богал Санахъоты Ацӕмӕз дӕр. Уый хорз рахӕцыд йӕ фыццаг дыууӕ ныхмӕлӕууӕгимӕ, рамбылдта сӕ ӕнӕкъуыхцыйӕ ӕмӕ ерысты ӕрдӕгкӕронбӕттӕны фембӕлд Кахаберимӕ. Дыууӕ ӕмбалы ерыс ахицӕн Хуыбецты Кахаберы пайдайӕн, ӕмӕ ма уый фӕстӕ Ацӕмӕзӕн фадат уыд ӕрмӕстдӕр 3-аг бынатыл тох кӕнынӕн. Уыцы гӕнӕнӕй Ацӕмӕз иттӕг хорз спайда кодта ӕмӕ йӕ ныхмӕлӕууӕг Дмитрий Зайнудиновӕй 4:0 хыгъдӕй куы рамбылдта, уӕд бацахста 3-аг бынат.
Хуыбецты Кахаберӕн кӕронбӕттӕны бантыст йӕ ныхмӕлӕууӕг Малик Шуваевы йе уӕнтыл сӕвӕрын ӕмӕ ссис турниры уӕлахиздзау. Нӕ богӕлттӕй ма кӕронбӕттӕнмӕ рацыдысты ӕмӕ 1-аг бынат бацахсынмӕ хӕстӕг уыдысты Гогаты Алан (70 кг), Тӕпсиаты Тамерлан (86 кг) ӕмӕ Коциты Знауыр (97 кг).
Гогаты Алан кӕронбӕттӕны тынг хъазуатон тохы фӕхӕрд 3:5 хыгъдӕй Исраил Касумовӕн ӕмӕ бацахста 2-аг бынат. Раст афтӕ рауадысты нӕ иннӕ дыууӕ богалы кӕронбӕттӕны тохтӕ дӕр. Тӕпсиаты Тамерлан фӕхӕрд Арсенали Масалалиевӕн, Коциты Знауыр та 2:4 хыгъдӕй фембылд Геннадий Кудиновичӕн (ерысты архайдта Германы номӕй).
Нӕ иннӕ богӕлттӕ: Сечъынаты Георги (65 кг), Рӕмонты Сослан (79 кг), Санахъоты Ацӕмӕз (79 кг), Нартыхъоты Радик (86 кг), Соттиты Аслӕнбег (92 кг) ӕмӕ Теблойты Ацӕмӕз (125 кг) бацахстой 3-аг бынӕттӕ ӕмӕ хорзӕхджын систы бронзӕ майдантӕй.
Владимир Семеновы номыл дунеон турниры уӕлахиздзаутӕ систы: 57 кг — Хасанхусейн Бадрудинов (Уӕрӕсе), 61 кг — Абдулмажид Кудиев (Уӕрӕсе), 65 кг — Юлиан Гергенов (Уӕрӕсе), 70 кг — Исраил Касумов (Уӕрӕсе), 74 кг — Тимур Бижоев (Уӕрӕсе), 79 кг — Хуыбецты Кахабер (Уӕрӕсе), 86 кг — Арсенали Мусалалиев (Уӕрӕсе), 92 кг — Магомед Курбанов (Уӕрӕсе), 97 кг — Геннадий Чудинович (Герман), 125 кг — Данило Картавый (Украинӕ).
