Ӕрбахӕццӕ та кӕны нӕ бӕстӕйы сӕйрагдӕр паддзахадон бӕрӕгбӕттӕй иу — Адӕмон иудзинады бон. Уыцы бӕрӕгбоны кадӕн, куыд Дзӕуджыхъӕуы, афтӕ республикӕйы ӕппӕт районты дӕр арӕзт ӕрцӕудзысты дзыллон кадджын хиирхӕфсӕн ӕмӕ бӕстӕзонӕн мадзӕлттӕ.
Зӕгъӕм, 4 ноябры стыр культурон-хиирхӕфсӕн программӕ ӕххӕстгонд цӕудзӕн Дзӕуджыхъӕуы Хетӕгкаты Къостайы номыл Астӕуккаг парчы. Уым бӕрӕгбоны мадзӕлттӕ райдайдзысты 12 сахатыл. Сывӕллӕттӕм ӕнхъӕлмӕ кӕсынц алыхуызон хиирхӕфсӕн мадзӕлттӕ хъӕзтытӕ ӕмӕ конкурстимӕ, хистӕр кары адӕмӕн дӕр уыдзӕн сӕ рӕстӕг уӕнгрогӕй арвитыны фадат. Парчы уыдзӕн бӕрӕгбоны концерт «Адӕмты хӕлардзинад» дӕр.
Беслӕны ипподромы та уыдзысты дугътӕ ӕмӕ бӕрӕгбоны концерт. Райдайӕн — 11 сахаты ӕмӕ 30 минутыл.
Кӕй зӕгъын ӕй хъӕуы, бӕрӕгбоны мадзӕлттӕ цӕудзысты 4 ноябры агъоммӕ дӕр. Зӕгъӕм, 1 ноябры республикӕйы цӕрджытӕн уыдзӕн ӕппӕтуӕрӕсеон дзыллон акци «Стыр этнографион диктант»-ы архайыны фадат. Уый уыдзӕн Цӕгат Ирыстоны Хетӕгкаты Къостайы номыл паддзахадон университеты, Мӕздӕджы Хӕлардзинады хӕдзары ӕмӕ республикӕйы ахуырадон кусӕндӕтты.
Сӕрмагонд ныхасы аккаг у ӕрвылазон ӕппӕтуӕрӕсеон культурон-ахуырадон акци «Аивӕдты ӕхсӕв». Уыцы акцийы фӕлгӕты республикӕйы музейтӕ ӕмӕ театрты, библиотекӕтӕ ӕмӕ Культурӕйы хӕдзӕртты арӕзт ӕрцӕудзысты цымыдисаг дзыллон мадзӕлттӕ. Акцийы бон — 3 ноябры — культурӕйы артдзӕстытӕ кусдзысты дзӕвгар фылдӕр рӕстӕг, суанг ӕмбисӕхсӕвмӕ. Уыцы бонмӕ культурӕйы кусӕндӕтты специалисттӕ бацӕттӕ кодтой лекцитӕ, мастер-класстӕ, нывтӕ ӕмӕ кинонывты равдыстытӕ…
«Аивадты ӕхсӕв»-ы мадзӕлттӕ цӕудзысты РЦИ-Аланийы Национ музейы хайӕдты, Мӕздӕджы бӕстӕзонӕн музейы, Дигорайы Цӕголы-фырты номыл историон-мемориалон музейы, республикӕйы Национ наукон библиотекӕйы ӕмӕ иннӕ кусӕндӕтты.
Адӕмон иудзинады бӕрӕгбонмӕ мадзӕлтты бӕстон номхыгъд ссарӕн ис ахӕм сайты: http://kpmk.alania.gov.ru/news/612.
