Раздӕр ацы бӕстыхӕйтты бынаты зӕронд фермӕтӕ кӕй уыд, уый бирӕтӕй ферох ис. Бирӕгъзӕнджы, Дзержинскийы номыл колхозы ӕхсыры-товарон фермӕйӕ ма ӕрмӕст къултӕ баззад. Фӕлӕ дзы бынӕттон амалхъом адӕм ногӕй цард бауагътой. Цы фермерон хӕдзарад дзы сарӕзтой, уый абон республикӕйы мӕргътӕ дарыны къабазы ис раззагдӕртимӕ.
Ӕрӕджы куыстуат бабӕрӕг кодта РЦИ-Аланийы хъӕууон хӕдзарады министры хӕдивӕг Рубайты Ибрагим.
— Паддзахадон ӕххуыс, гранты хуызы куы райста ацы хӕдзарад,уӕд ӕвӕстиатӕй куыстытӕм бавнӕлдтой. Сӕ ӕнтыстдзинӕдтӕн сын ӕвдисӕн стӕм. Архайдзыстӕм, цӕмӕй ахӕм хӕдзарӕдтӕ фылдӕр уа Ирыстоны, — загъта Рубайы-фырт.
2016 азы Гӕбуты Игорь ӕмӕ Гуыриаты Георги сфӕнд кодтой хи куыстуат саразын. Сӕхи хуызӕн куыстуарзаг, сӕрӕн лӕппутимӕ ӕрлӕууыдысты куысты уӕлхъус. Цыбыр рӕстӕгмӕ тыгъд быдыры сырӕзт ног бӕстыхай. Урс чъырӕй цагъд къултӕ ӕмӕ пъолтӕ, автоматикӕ холлаг ӕмӕ дон дӕтты, бынӕттӕ сыгъдӕг кӕны, рухс ӕмӕ райдзаст стыр корпус. — ам дарынц ӕфтауӕг кӕрчытӕ.
— Хӕрзмыггаг немыцаг кӕрчытӕ сты, Ломан Браун сӕ хонынц. Хицӕн кӕнынц, айк ӕфтауын сӕ бон бирӕ рӕстӕг кӕй у,уымӕй, — зӕгъӕм,афӕдзмӕ иу карк ратты 300-320 айчы. Фыццаг продукци та раттынц 135-бондзыдӕй. Ныридӕгӕн адӕмӕн ауӕй кодтам 16 милуаны ног ӕфтыд ӕйчытӕ, — зӕгъы Гуыриаты Георги.
Фыццаг къордӕн сӕ ӕфтауыны рӕстӕг куы ахицӕн, уӕд кӕрчыты ауӕй кодтой аслам аргъӕй. Дыууӕ мӕйы размӕ та ногӕй ӕрбаластой 50 мин карчы. Иу къуырийы размӕ ӕфтауын райдыдтой, уымӕн ӕмӕ сӕ дарынц, хуыздӕр нӕ вӕййы, ахӕм уавӕрты.
— Бӕркад фӕллойӕ цӕуы, — арӕх фӕзӕгъы Гӕбуты Игорь. — Карчы куыст кӕнгӕйӕ, ӕнӕмӕнг хъӕуы санитарон-ветеринарон домӕнтӕ ӕххӕст кӕнын, холлӕгты хӕрзхъӕддзинадмӕ кӕсын. Ис нӕм хорз куырой, ӕмхӕццӕ холлӕгтӕ дзы кӕнӕм. Нӕ куыстӕй зӕрдӕрухс стӕм.
Ӕцӕгӕйдӕр, ӕрмӕст ӕхсызгондзинад райсӕн ис ацы куыстуат бабӕрӕг кӕнгӕйӕ. Нӕ дзы банкъардзынӕ ӕвзӕр тӕф, уымӕн ӕмӕ дзы кӕрӕй-кӕронмӕ кусы нырыккон вентиляцион системӕ. Йӕ дӕргъ 120 метры кӕмӕн у, ахӕм фондзуӕладзыгон чырӕгтӕ дзы лӕууы, алкӕцыйы дӕр хицӕнӕй ис фӕйнӕ аст карчы. Хӕринаг, дон, рухс, хъӕугӕ температурӕмӕ кӕсы компьютерон системӕ. Бур-хъулон ӕмӕ урс кӕрчытӕн сӕ бын у сыгъдӕг. Цӕмӕй инфекцийӕ хъахъхъӕд уой, уый тыххӕй сӕм адӕймаджы къух нӕ хӕццӕ кӕны ӕппындӕр. Айк йӕхӕдӕг ратулы транспортермӕ, афтӕмӕй бахӕццӕ вӕййы хицӕн агъуыстмӕ. Ам сылгоймӕгтӕ айк ӕвзарынц йӕ хуызмӕ ӕмӕ йӕ уӕзмӕ гӕсгӕ, стӕй йӕ къоппыты ӕфснайынц.
— Стыр ӕргом здахӕм продукцийы хӕрзхъӕддзинадмӕ, — зӕгъы ацы цехы кусӕг Мсойты Аидӕ. Ставд ӕмӕ лыстӕг айк хицӕн кӕнӕм, уымӕ гӕсгӕ у йӕ аргъ дӕр. Зӕгъӕм, фыццаг сорт айкӕн йӕ уӕз у 65 граммы бӕрц.
Раппӕлинаг у сӕ куыст Сохиты Риммӕ ӕмӕ Мецъыты Альбинӕйӕн дӕр. Сӕрмагонд лаборатори бӕрӕг кӕны продукцийы хӕрзхъӕддзинад.
Холлӕгтӕ цӕттӕгӕнӕн цехы баййӕфтам Агънаты Русланы. Йӕ куыст зоны ӕмӕ уарзы. Алцӕмӕй ӕххӕст холлӕгтӕ куысты рахӕцӕн сты, ӕмӕ Руслан хӕдзардзинӕй архайы. Ӕрвылбон ӕрцӕттӕ кӕны 5-6 тоннӕйы бӕрц холлӕгтӕ. Автоматизацийы ӕххуысӕй, иу цехӕй иннӕмӕ цӕуы алы чырӕгмӕ дӕр. Хиконд холлӕгтӕ, кӕй зӕгъын ӕй хъӕуы, фӕстауӕрц кӕнынц бирӕ фӕрӕзтӕ. Нартхор, мӕнӕу, цъата, сойӕ ӕмӕ ӕхсынӕны цъӕл, чъыр, уыимӕ протеинтӕ, премикстӕ— ахӕм пайдаджын холлаг цӕттӕ кӕны Руслан йӕ къӕбицы. — Фӕрӕдийыны бар дзы нӕй, уымӕн ӕмӕ рацион афтӕ конд у, цӕмӕй ӕрвылбон ӕфтауой айк, йӕ цъар дӕр хъуамӕ фидар уа, — зӕгъы Руслан.
Ныртӕккӕ фермерон хӕдзарады кусы 30 адӕймаджы. Фӕлӕ, Гуыриаты Георгийы ныхасмӕ гӕсгӕ, хӕстӕгдӕр рӕстӕг бавналдзысты ноджыдӕр ма иу зӕронд бӕстыхай сцалцӕг кӕнынмӕ. Уым дӕр дардзысты, айк хорз чи ӕфтауы, ахӕм кӕрчытӕ. Фӕзындзӕн та ног куысты бынӕттӕ. Сӕ куыстӕй сӕм цы ӕфтиӕгтӕ хауа, уыдонӕй пайда кӕндзысты хӕдзарады райрӕзтӕн, фӕлӕ сӕ паддзахады ӕххуыс дӕр бахъӕудзӕн.
Ӕрвылбон мӕргътӕдарӕн цехӕй 1,5-2 мин ног ӕфтыд айчы аласынц, Алагиры сын цы чысыл дукани ис, уырдӕм. Ӕлхӕнӕг ын кӕддӕриддӕр ис, уымӕн ӕмӕ у аслам. — Фӕнды нӕ, цӕмӕй адӕм нӕ фыдӕбонӕн аргъ кӕной, уымӕй хуыздӕр ницы ис, — зӕгъы Игорь. — Зонӕм ӕй, нӕ продукци хъӕуы районы ӕмӕ республикӕйы. Сыгъдӕг цӕсгомӕй кусдзыстӕм.
Цӕгӕраты Жаннӕ
