Кӕцыфӕнды дины нысан у, адӕймагмӕ хуыздӕр цы миниуджытӕ ис, уыдон ӕхсӕнады парахат кӕнын, алы адӕмыхӕттыты ӕмӕ алы динты минӕвӕртты кӕрӕдзи уарзыныл ӕмӕ кӕрӕдзиимӕ хӕлар цӕстӕй кӕсыныл ахуыр кӕнын.
Дины ацы нысантӕ ӕххӕст кӕныны хорз ӕнтысы нӕ республикӕйы Пысылмӕтты дины управленийӕн. Ацы бонты уый кадджын уавӕры сбӕрӕг кодта йӕ 25 азы юбилей. Ӕрхуыдта йӕм Цӕгат Кавказы ӕппӕт республикӕты пысылмӕтты ӕхсӕнадты минӕвӕртты Дагестанӕй, Цӕцӕнӕй, Кӕсӕг-Балхъарӕй, Мӕхъӕлӕй, Хъӕрӕсе-Черкесийӕ, Адыгейӕ, стӕй Мӕскуыйӕ. Уымӕй уӕлдай, бӕрӕгбоны мадзӕлтты архайдта Азербайджаны Республикӕйы делегаци, йӕ сӕргъы — Кавказы Пысылмӕтты управленийы сӕрдар шейх-уль-Ислам Аллахшукюр Паша-Заде.
Цӕгат Ирыстонмӕ сӕ балцы фыццаг бон азербайджайнаг уазджытӕ бабӕрӕг кодтой, Фыдыбӕстӕйы Стыр хӕсты азты ирыстойнаг зӕххыл чи хӕцыд, Азербайджайнаг уыцы 223-ӕм ӕхсӕн дивизийӕн Мӕздӕджы районы Веселӕйы хъӕуы цы цыртдзӕвӕн ис, уый ӕмӕ сӕ ӕдзард хӕстонты ингӕныл сӕвӕрдтой дидинджытӕ. 1942 азы ноябры ацы ран цыд карз хӕст, немыцӕгтӕ лӕбурдтой Мӕздӕгмӕ, уырдыгӕй сӕ фӕнд уыд Бакуйы нефты гуырӕнтӕ бацахсын ӕмӕ ацы ран знагӕн ӕнӕбауромгӕ нӕ уыд. Мӕздӕджы бынмӕ карз хӕстыты дивизийы хӕстонтӕн сӕ 80 проценты фӕмард сты ам. Веселӕйы хъӕугӕрон сын цы цыртдзӕвӕн ис, уым арӕзт ӕрцыд митинг. Азербайджайнаг уазджытӕй уӕлдай дзы архайдтой нӕ республикӕйы национ ахастдзинӕдты фарстаты фӕдыл министр Цуциты Аслан, Ветеранты советы сӕрдары хӕдивӕг Бедойты Руслан, Мӕздӕджы районы сӕргълӕууӕг Гугиты Геннади, республикӕйы Пысылмӕтты дины управленийы сӕрдар Гуӕцӕлты Хадзымурат. Иу минут ӕдзӕмӕй алӕугӕйӕ, митинджы архайджытӕ ссардтой Фыдыбӕстӕйы Стыр хӕсты фӕмардуӕвӕг Азербайджайнаг дивизийы ӕфсӕддонты рухс нӕмттӕ.
Знон та Цӕгат Ирыстоны Пысылмӕтты дины управленийы юбилейы фӕдыл Дзӕуджыхъӕуы Евгений Вахтанговы номыл Уырыссаг академион театры уыд кадджын ӕмбырд. Хуынд уазджытӕй уӕлдай дзы архайдтой Цӕгат Ирыстоны Сӕргълӕууӕг Битарты Вячеслав, нӕ республикӕйы Парламенты Сӕрдар Алексей Мачнев, профилон министрадты, ведомствӕтӕ ӕмӕ бынӕттон хиуынаффӕйады разамонджытӕ, республикӕйы ӕппӕт динты ӕмӕ ӕхсӕнадон организациты минӕвӕрттӕ.
Бӕрӕгбоны архайджытӕн арфӕ ракодта Битарты Вячеслав. Куыд загъта, афтӕмӕй Цӕгат Ирыстоны Пысылмӕтты дины управлени 25 азмӕ сси республикӕйы ӕхсӕнадон-политикон царды ахсджиагдӕр ӕмӕ разӕнгарддӕр цӕджындзтӕй иу ӕмӕ архайы ӕппӕт фарстытӕ лыг кӕныны, фыццаджыдӕр, кӕстӕрты хъомылады, удыхъӕды хуыздӕр миниуджытыл сӕ ӕфтауыны, адӕмты ӕмӕ динты ‘хсӕн халардзинады тӕгтӕ фидар кӕныны ӕмӕ, Цӕгат Ирыстоны цы бирӕ адӕмыхӕттыты ӕмӕ алыхуызон динты минӕвӕрттӕ цӕры, уыдоны ахуыр кӕны кӕрӕдзи уарзыныл ӕмӕ кӕрӕдзийӕн аргъ кӕныныл. Арфӕйы ныхӕстимӕ республикӕйы Сӕргълӕууӕг Пысылмӕтты дины управленийы сӕрдар Гуӕцӕлты Хадзымуратӕн балӕвар кодта Хъуыран. Цӕгат Ирыстоны Сӕргълӕууӕджы Арфӕйы фыстӕджытӕй хорзӕхджын ӕрцыдысты Пысылмӕтты дины управленийы уӕнгтӕ.
Цӕгат Ирыстоны Пысылмӕтты дины управленийы архайдӕн хорз аргъ скодта азербайджайнаг делегаци. Азербайджаны Президент Ильхам Алиевы номӕй арфӕйы ныхӕстӕ загъта йе ‘ххуысгӕнӕг Магомед Алигасанов. Ирон ӕмӕ азербайджайнаг адӕмты ‘хсӕн хӕлдардзинад ӕмӕ ӕфсымӕрон бастдзинад фидар кӕныны тыххӕй Азербайджаны Президенты уынаффӕйӕ Гуӕцӕлты Хадзымурат хорзӕхджын ӕрцыд Азербайджаны Республикӕйы уӕлдӕр хӕрзиуӕг — Хӕлардзинады орденӕй.
Уазджытӕн арфӕ ракодта Цӕгат Ирыстоны Парламенты Сӕрдар Алексей Мачнев дӕр.
— Адӕм кӕрӕдзи куы уарзой ӕмӕ кӕрӕдзи куы ӕмбарой, алыхуызон адӕмты ӕмӕ динты минӕвӕрттӕ кӕрӕдзиимӕ уарзонӕй ӕмӕ хӕларӕй куы цӕрой, уӕд уымӕн аргъ нӕй. Уыцы хъуыддаджы хорз ӕнтысы нӕ республикӕйы Пысылмӕтты дины управленийӕн, ӕмӕ сын мӕ зӕрдӕ зӕгъы, дарддӕр дӕр уыцы фӕндагыл ӕнтыстджынӕй куыд цӕуа, — загъта Парламенты Сӕрдар.
Арфӕгӕнджыты ‘хсӕн уыдысты Кавказы Пысылмӕтты управленийы сӕрдар шейх-уль-Ислам Аллахшукюр Паша-Заде, Кавказы Пысылмӕтты координацион центры сӕрдар Хаджи Бердиев, Уӕрӕсейы Пысылмӕтты дины управленийы сӕрдары фыццаг хӕдивӕг Дамир Мухиддинов, нӕ республикӕйы Ветеранты советы сӕрдар Къаболаты Солтан, Цӕгат Ирыстоны адӕмон поэт Гуырдзыбеты Иринӕ.
Бӕрӕгбоны мадзӕлтты архайджытӕн арфӕ кӕнгӕйӕ, Гуӕцӕлты Хадзымурат загъта, разы кӕй у республикӕйы Сӕргълӕууӕг Битарты Вячеславӕй, сӕ алы хъуыддаджы дӕр сӕ фарсмӕ кӕй ӕрбалӕууы ӕмӕ республикӕйы ахсджиагдӕр фарстытыл иумӕ кӕй архайынц, уый тыххӕй.
— Нӕ республикӕйы Пысылмӕтты дины управлени дарддӕр дӕр архайдзӕн, цӕмӕй ӕппӕт Цӕгат Кавказы алы адӕмыхӕттыты ӕмӕ алы динты минӕвӕрттӕ цӕрой хӕларӕй, кӕрӕдзи уарзгӕйӕ ӕмӕ кӕрӕдзийӕн аргъ кӕнгӕйӕ, — загъта Цӕгат Ирыстоны муфти.
ДЕДЕГКАТЫ Зӕлинӕ
Къамтӕ систа Къӕбысты Харитон
