Ӕппӕтуӕрӕсеон адӕмон фронты цӕгатирыстойнаг хайады активисттӕ регионы хицауады ӕргом аздӕхтой Дзӕуджыхъӕуы тӕссаг ӕнӕхицау объекттӕм.
Дзӕуджыхъӕуккӕгтӕ Адӕмон фронтмӕ сӕ хъӕстытӕ кӕй тыххӕй барвыстой, уыцы ӕнӕхицау объекттӕ бабӕрӕг кодтой ӕхсӕнадон организацийы цӕгатирыстойнаг эксперттӕ ӕмӕ горӕты администрацийы минӕвӕрттӕ. Ӕртӕ ӕнӕхицау бӕстыхайы хаст ӕрцыдысты регионы тӕссаг объектты номхыгъдмӕ. Адӕмон фронты акци «ӕдас сабидуг»-мӕ гӕсгӕ цы аиппытӕ раргом кодтой, уыдон растыл банымадта горӕты муниципалитет. Ӕхсӕнадон организацийы уӕнгтӕ цы хабӕрттӕ ӕрӕмбырд кодтой, уыдон барвыстой цӕстдарӕг службӕтӕм.
Цӕмӕй сывӕллӕттӕн кӕлӕддзаг бӕстыхӕйттӕм уӕгъдибарӕй бацӕуыны фадат ма уа, уый тыххӕй дзыллон хабархӕссӕг фӕрӕзты минӕвӕрттимӕ арӕзт ӕрцыд инспекцион балц.
— Горӕты ӕддаг бакаст чи халы ӕмӕ бырондӕттӕ кӕмӕй рауад, уыцы ӕнӕхицау бӕстыхӕйтты мидӕг тӕссаг уавӕрты хъазынц фӕсивӕд. Ацы бӕстыхӕйттӕ сты ӕмбондӕй ӕрӕхгӕнинаг, науӕд та ӕвӕстиатӕй — райхалинаг. Инспекцион балцы бӕрӕггӕнӕнтӕм гӕсгӕ, уыдонмӕ хауынц Павловы фӕрсуынджы 4-ӕм, Владикавказаг уынджы 63-ӕм, стӕй Тельманы уынджы 26-ӕм ӕмӕ 28-ӕм хӕдзӕрттӕ. Адӕмон фронты минӕвӕрттӕ тӕссаг бӕстыхӕйтты регионалон номхыгъдмӕ кӕй бахастой, уыцы объекттӕй иуы дӕр хъахъхъӕнджытӕ нӕй, ӕмӕ сӕ рауад нуазӕн бынӕттӕ. 2007 азӕй нырмӕ ӕрдӕгарӕзт хӕдзӕрттӕ раууатмӕ ӕрцыдысты. Бӕстыхӕйтты алыварс фӕзынд бырӕтты цӕндтӕ, — зӕгъы ӕппӕтуӕрӕсеон адӕмон фронты цӕгатирыстойнаг регионалон штабы ӕмсӕрдар Роман Кудренко.
Сывӕллӕттӕ райхалинаг бӕстыхӕйтты арӕх арт бандзарынц, стӕй сын сӕ уӕллаг уӕладзгуытӕм схизынц ӕмӕ тӕссаг уавӕры бахауынц. Инспекторты хатдзӕгтӕ ӕрвыст ӕрцыдысты барадхъахъхъӕнӕг оргӕнтӕм.
Бӕдтиаты Оксанӕ
