Цӕгат Ирыстоны Хицауады хӕдзары цы ӕмбырд уыд, уым сбӕрӕг сты ӕппӕтуӕрӕсеон конкурс «2019 азы хуыздӕр социалон проект»-ы республикон къӕпхӕны уӕлахиздзаутӕ.
Зындгонд куыд у, афтӕмӕй ацы ӕппӕтуӕрӕсеон конкурсы республикон къӕпхӕны архайынмӕ куырдиӕттӕ ацы аз ӕрбалӕвӕрдтой 46 куыстуаты. Уыдонӕй конкурсы архайыны фадат уыд 37 проектӕн. Ӕмӕ ныр экспертон къамис фехъусын кодта хуыздӕрты нӕмттӕ.
Афтӕмӕй, конкурсы регионалон къӕпхӕны уӕлахиздзауты сертификаттӕ саккаг кодтой ӕнӕххӕст бӕрнондзинады ӕхсӕнӕдтӕ «Алания-Хелскеа», «Абат», «Кубик-Рубика» ӕмӕ хицӕн амалиуӕггӕнджытӕ Сергей Селезнев ӕмӕ Табуты Георгийӕн. Ацы компанитӕ ӕмӕ хицӕн адӕймӕгтӕ конкурсмӕ бавдыстой цымыдисаг социалон проекттӕ. Уыдон баст сты медицинон лӕггӕдтимӕ, сахъат сывӕллӕтты ӕнӕниздзинад фидардӕр кӕнынимӕ, стӕй ӕндӕр ахсджиаг хъуыддӕгтимӕ.
Конкурсы регионалон къӕпхӕны уӕлахиздзаутӕн арфӕ ракодтой республикӕйы экономикон рӕзты министры хӕдивӕг Кочиты Сослан, УФ-йы Экономикон рӕзты министрады эксперт Денис Богатов, Амалхъомады райрӕзтӕн ахъазгӕнӕг фонды директор Гаджиты Батрадз ӕмӕ иннӕтӕ.
Ныр конкурсы лауреаттӕ архайдзысты ӕппӕтуӕрӕсеон кӕронбӕттӕн ерысты. Уыдоны нӕмттӕ та сбӕрӕг уыдзысты декабры. Уыимӕ, конкурсы уӕлахиздзаутӕн ӕххуыс уыдзӕн сӕ проекттӕ царды рауадзынӕн.
Ӕппӕтуӕрӕсеон конкурс «2019 азы хуыздӕр социалон проект» арӕзт цӕуы УФ-йы Экономикон рӕзты министрад ӕмӕ Уӕрӕсейы паддзахадон социалон университеты хъӕппӕрисӕй.
Нӕ уацхӕссӕг
