Знон Цӕгат Ирыстоны Сӕргълӕууӕг Битарты Вячеславӕн фембӕлд уыд республикӕйы Хицауады Сӕрдары хӕдивӕг Иринӕ Азимова ӕмӕ культурӕйы министр Къубалты Эльбрусимӕ. Фембӕлды архайджытӕ ӕрдзырдтой республикӕйы культурӕйы къабазы райрӕзты фарстытыл.
Битарты Вячеслав йӕ хъуыды загъта, адӕмон кӕфтыты академион ансамбл «Алан»-ы цур кусӕг сывӕллӕтты студийы дарддӕры хъысмӕты тыххӕй. Республикӕйы разамонӕджы ныхасмӕ гӕсгӕ, республикӕ ацы сфӕлдыстадон коллективӕй алкӕддӕр сӕрбӕрзонд уыд, ансамбл бирӕ уӕрӕсейаг ӕмӕ фӕсарӕйнаг регионты цӕрджыты базонгӕ кодта Ирыстоны аивадимӕ. Ӕмӕ ахсджиаг у, цӕмӕй кафджыты ӕрыгон фӕлтӕртӕ рӕзой хистӕрты фӕлтӕрддзинадыл, сӕ ахуыр та хъуамӕ уа лӕвар.
Ныхасы архайджытӕ се ‘ргом аздӕхтой бӕхты театр «Нарт»-ы дарддӕры архайдмӕ дӕр. Къубалты Эльбрус куыд фӕнысан кодта, афтӕмӕй театрӕн балхӕндзысты бӕхтӕ, стӕй куыст цӕуы, цӕмӕй коллективы уа фылдӕр ӕрыгон артисттӕ.
Фембӕлды рӕстӕг сӕрмагондӕй ӕркастӕуыд Цӕгат Ирыстоны Национ музейы дарддӕры рацарӕзты фарстмӕ. Битары-фырт культурӕйы министрӕн бахӕс кодта, цӕмӕй ӕппӕт нысангонд куыстытӕ дӕр азы кӕронмӕ ахицӕн уой ӕмӕ музей кусын райдайа 2020 азы. Цӕгат Ирыстоны Сӕргълӕууӕг арфӕ ракодта, Иринӕ Азимова ӕмӕ Къубалты Эльбрусӕн ирон литературӕйы бындурӕвӕрӕг Хетӕгкаты Къостайы 160 азы кадӕн мадзӕлттӕ бацӕттӕ кӕныныл зӕрдиагӕй кӕй бакуыстой, уый тыххӕй. Республикӕ уӕрӕх сбӕрӕг кодта уыцы юбилей, арӕзт ӕрцыдысты бирӕ алыхуызон культурон ӕмӕ рухстауӕн дзыллон мадзӕлттӕ. Уыдоны архайдтой ӕрмӕст Ирыстоны цӕрджытӕ нӕ, фӕлӕ бӕстӕйы иннӕ регионтӕй кадджын уазджытӕ дӕр. УФ-йы Хицауады ӕххуысӕй Уӕрӕсейы Стыр театры арӕзт ӕрцыд Къостайы номарӕн изӕр дӕр.
Фембӕлды рӕстӕг куыд загъдӕуыд, афтӕмӕй ацы аз арӕзт ӕрцыд хихъӕппӕрисадон аивады республикон ӕркаст «Иры фарн» дӕр. Ацы хатт уыцы мадзал арӕзт ӕрцыд Къостайы райгуырды 160 азы кадӕн. Ӕркасты сӕйрагдӕр нысан у ӕрыгон курдиӕттӕ раргом кӕнын, стӕй сфӕлдыстадон коллективты архайдӕн ахъаз кӕнын. «Иры фарн» арӕзт цӕуы Битарты Вячеславы хъӕппӕрисӕй.
Кӕронбӕттӕны республикӕйы разамонӕг куыд фӕнысан кодта, афтӕмӕй курдиатджын сывӕллӕттӕн ӕххуысы мадзӕлттӕм здӕхт цӕудзӕн фыццаградон ӕргом.
РЦИ-Аланийы Сӕргълӕууӕджы ӕмӕ Хицауады пресс-службӕ
