20 декабры республикӕйы ног арӕндоны гинекологийы хайад райсдзӕн фыццаг ӕнхъӕлцау сылгоймӕгты. Медицинон комплексы дыууӕуӕладзыгон бӕстыхай байгом кӕнынмӕ цӕттӕ у. Арӕндон сифтонг кодтой ног кусӕнгӕрзтӕ ӕмӕ ӕнӕмӕнгхъӕугӕ дзаумӕттӕй. Ног арӕндонӕй медиктӕ сты райгонд.
— Ӕнхъӕлцау сылгоймӕгтӕн рӕстӕгмӕ уӕвынӕн, медиктӕн та — кусынӕн арӕндоны арӕзт ӕрцыд удӕнцой уавӕртӕ. Зӕронд арӕндонимӕ абаргӕйӕ, ног агъуыст у бӕлвырд хуыздӕр, — зӕгъы йӕ сӕйраг медицинон хо Каджаты Аленӕ.
Арӕн хайады ис 30 сынтӕджы, гинекологийы хайады та — 20 бынаты. Алы райдзаст хатӕны дӕр ис хицӕн санитарон бынат ӕмӕ хинайӕн. Ӕппӕт хатӕнтӕ дӕр арӕзт сты, ныййарджытӕ ӕмӕ ноггуырдтӕ иумӕ куыд уой, афтӕ. Хатӕнтӕ ифтонггонд сты ӕвӕстиатӕй бадзурыны фӕрӕзтӕй.
Бӕстыхайы ис арыны фӕстӕ ӕмӕ гинекологийы хайӕдтӕ, операцимӕ ӕнхъӕлмӕ кӕсӕн ӕмӕ операцигӕнӕн залтӕ, стӕй физкультурӕгӕнӕн уат. Фыццӕгӕм уӕладзыджы ис дӕндӕгты дохтыры кусӕнуат (дохтыртӕ ӕнӕмӕнг фӕбӕрӕг кӕнынц ӕнхъӕлцау сылгоймӕгты дӕндӕгты уавӕр). Ныййарджытӕ цӕудзысты ультразӕлон иртасынад дӕр. Арӕндоны цы ӕртӕ лифты ис, уыдонӕй дыууӕ ласынц адӕмы, иу та — уӕзӕгтӕ.
Ног бӕстыхайы ис ӕртӕ арӕн хайады (сӕ иу арӕзт у хицӕнӕй; исдзысты йӕм хӕцгӕ низтимӕ ӕнхъӕлцау сылгоймӕгты).
Хиуӕттӕ ноггуырдимӕ кӕм ӕмбӕлдзысты, уыцы агъуыст нымад у арӕндоны ӕппӕтӕй ахсджиагдӕр бынатыл. Йӕ къултӕ сфидыдтой, сывӕллонимӕ къадзы ныв кӕм ис, ахӕм аив баннерӕй.
Арӕндоны фыццаг хайы сты техникон ӕмӕ ӕххуысадон хатӕнтӕ, ис дзы кусджытӕн фӕлладуадзӕн агъуыст. Арӕндоны алфамбылай у аив, ныссагътой дзы хихджын бӕлӕсты талатӕ ӕмӕ къутӕртӕ. Ис дзы фӕхсбандӕттӕ ӕмӕ хӕдтулгӕтӕн лӕууӕн бынат.
Ног арӕндон рагӕй уыд аразинаг. Зӕронд бӕстыхай сарӕзтой 1955 азы, ӕмӕ бирӕ нырыккон домӕнты аккаг нал уыд. Ацы бӕстыхай рацаразынмӕ хъавынц клиникон-диагностикон лаборатори ӕмӕ ӕнӕниздзинад хъахъхъӕнынады министрадӕн.
Ног арӕндон сарӕзтой 2018-2019 азты социалон-экономикон рӕзтӕн ахъаз кӕныны инвестицион программӕмӕ гӕсгӕ. Радих ын кодтой 488 милуан сомы. Сарӕзта йӕ ӕнӕххӕст бӕрнондзинады ӕхсӕнад «СТМ-ЮГ». Объект куы скуса, уӕд республикӕйы демографион уавӕр кӕй фӕхуыздӕр уыдзӕн, ууыл зӕрдӕ дарӕн ис.
Киситы Аленӕ
