Уӕрӕсейы инвестицион программӕмӕ гӕсгӕ Хуссар Ирыстоны сарӕзтой Гуырдзыстонимӕ ӕмарӕн районмӕ фӕндаг.
— Цхинвалы районы Громы хъӕуӕй Ленингоры районы Цъинагармӕ сарӕзтам Гуырдзыстоны арӕнмӕ ‘ввахс 14,6 километры дӕргъӕн фӕндаг. Ныртӕккӕ объект раттынӕн цӕттӕ кӕнӕм ӕмбӕлгӕ гӕххӕттытӕ. Хуссар Ирыстоны социалон-экономикон рӕзтӕн ахъазкӕнынады уӕрӕсейаг инвестицион программӕ фӕндаджы арӕзтадӕн радих кодта 260 милуан сомы. Республикӕйы разамынд рагӕй кӕуыл ныхас кӕны, Гуырдзыстонимӕ ӕмарӕн Цъинагары, Абреуы, Гдулеты, Монестеры, Дзукъатыхъӕу ӕмӕ Орчъосаны хъӕутӕм фӕндаджы арӕзтады программӕ сӕххӕст кӕнын бантыст Уӕрӕсейы ӕхцаты ӕххуысӕй. Ацы объект 5-ӕм къӕпхӕны фӕндагыл нымад кӕй у, уымӕ гӕсгӕ йӕ ӕмбӕрзын ӕмбӕлы асфальтӕй нӕ, фӕлӕ хуыр ӕмӕ змисӕй. Проектмӕ гӕсгӕ фӕндагыл арӕзт ӕртӕ хидӕй иуӕн ис стыр, дыууӕйӕн та — чысыл ӕнцӕйттӕ, — загъта республикӕйы паддзахадон куыстуат «Дорэкспострой»-йы разамонӕг Лалыты Мурат.
(«Осинформ»)
