Знон нæ республикæйы скъолаты райдыдта ног ахуыры аз. Æппæт скъоладзаутимæ ныр æрвылрайсом цингæнгæйæ уайдзысты Фыййаджыбылы астæуккаг скъолайы 95 ахуырдзауы дæр.
Уыдонæй 11 чызджы æмæ лæппуйы сты фыццагкъласонтæ. Республикæйы Сæргълæууæджы номæй се ‘ппæтæн дæр раттой лæвæрттæ. Ивгъуыд аз скъола æрцыд бындурон цалцæггонд, ис дзы алы уавæртæ ахуырæн æмæ хъомыладон куыстæн, йæ райдзаст кълæстæ æмæ тыргътæ æнхъæлмæ кастысты сывæллæттæм. Бæрæгбонмæ скъолайы кæрт саив кодтой. Райсом раджы хъæубæсты уынгтæ сфидыдтой хæрзарæзт сабиты хъæлдзæг уынæрæй. Сæ циныл бацин кæнынмæ æрбацыдысты уазджытæ – Æрыдоны муниципалон районы администрацийы минæвар Плиты Таймураз, сывæллæтты спортивон скъолайы директоры хæстæ æххæстгæнæг Плиты Азæмæт, хъæуы цæрджытæ.
– Айсут мæ зæрдиаг арфæ нæ сабитæ, ныййарджытæ, ахуыргæнджытæ æмæ уазджытæ. Нæ сывæллæттæ амондджын бон æрбакъахдзæф кæнæнт скъоламæ. Зонындзинæдтæм тырнгæйæ нæ кæстæртæн бирæ бантысæд!, – загъта скъолайы директоры хæстæ рæстæгмæ æххæстгæнæг Гаппуаты Иринæ.
Хъæубæсты буц хистæр, педагогон фæллойы ветеран Хъулаты Ирбег зæрдæбын арфæ ракодта æрыгон фæлтæрæн. – Уæ дуне сабыр уæд, ахуыры бæрзæндтæм схизут, зæрдæрухс уæ куыд уой уæ ахуыргæнджытæ æмæ уæ ныййарджытæ!
Бæрæгбоны сæйрагдæр архайджытæ уыдысты фыццагкъласонтæ. Сабитæ бацæттæ кодтой æмæ аив бакастысты æмдзæвгæтæ æмæ акодтой хъæлдзæг зарæг.
Фыццаг дзæнгæрæг ныццагътой иуæндæсæмкъласон Гутнаты Игорь æмæ фыццагкъласон Гайты Агуындæ æмæ скъоладзаутæн райдыдта ног ахуыры аз.
Ирыстоны æппæт сабитæн дæр сæ фидæн рæсугъд æмæ бæллиццаг уæд!
Фæрниаты Мæдинæ
